نص شهادة رجل أعمال في قضية أثار حسن راتب

 

نص شهادة رجل الأعمال وليد عبد العظيم صاحب مصنع حديد، أمام النيابة عن توسطه لفض الخلاف بين حسن راتب وعلاء حسانين.

 

س/ ماهي طبيعة عملك تحديداً؟

ج/ أنا صاحب مصانع حديد وصلب.

 

س/ ما هي علاقتك بالمتهم علاء محمد حسانين محمد ؟

ج/ أنا علاقتي بعلاء أنه كان عضو مجلس النواب عن دايرة دير مواس وأتعرف عليا عن طريق أنه قام بشراء لودر عام 2006 أو 2007 كان بيعمل محجر رخام في المنيا ومن ساعتها سار علاقة وتعارف بيني وبين علاء وكنت باشوفه دايما عند الدكتور حسن راتب في القصر بتاعه ف في منيل شيحا.

 

س/ وما هي علاقتك بالمتهم حسن كامل راتب؟

ج/ علاقتي بالدكتورحسن تمثل في انه يمتلك أسهم في مصنع سينا للأسمنت، وأنا كنت موزع معتمد وباشتري منه أسمنت وأبيعه، ومن هنا بدأت علاقتي بالدكتور حسن وبقيت على تواصل معاه على فترات.

 

س/ وما هي الفترة الزمنية التي استمرت فيها علاقتك بالمتهم علاء محمد حسانين تحديداً؟

ج/ هي فترات زمنية متباعدة بدأت من عام ٢٠٠٦ أو ۲۰۰۷ تقريباً حتى عام ۲۰۱۷ واستمرت بعد كدة بس على فترات متباعدة كل خمس أو أربع أشهر وممكن أقابله صدفة في أي مكان أروح فيه ولكن مش بصفة مستمرة.

س/ وهل نما إلى علمك إبان فترة تعارفك على المتهم علاء محمد حسانين أي معلومات تفيد قيام سالف الذكر بالاتجار في الاثار أو أي معلومات تفيد ذلك؟

ج/ أنا ماشفتش بعيني أي حاجة لها علاقة بقيام علاء حسانين بالاتجار في الآثار أو التعامل في الآثار ولكن هو كان معروف عنه ومشهور في ذلك الوقت أنه بتاع عفاريت وبيستخدم أعمال السحر والشعوذة في إخماد الحرائق ومعالجة المرضى والناس من الأمراض بأستخدام العفاريت ولكن كاثار لم ارى بعینی ای حاجة بخصوص ذلك.

 

س/ هل نما إلى علمك إبان فترة تعارفك على المتهم حسن كامل راتب أي معلومات تفيد قيام سالف الذكربالاتجار في الآثار أو الاشتراك فيها؟

ج/ أنا ماشفتش ولا سمعت أي حاجة بخصوص قيام الدكتور حسن راتب بالاتجار في الآثار أو حتى التعامل فيها ولكن لما قعدت مع علاء حسانين بخصوص الوساطة بينه وبين الدكتور حسن راتب.

س/ هل كانت هناك علاقة عمل فيما بين سالفي الذكر؟

ج/ على حد علمي ماكنتش أعرف اذا كان فية بينهم عمل من عدمه ولكن لما اثير أمامي في فترة عام ٢٠١٧ أن علاء اتحبس بسب قضية رفعها الدكتور حسن عليه والدكتور حسن حكي لى قصة الفلوس الى على علاء له.

س/ وما هي طبيعة العلاقة فيما بين المتهمين علاء محمد حسانين وحسن كامل راتب؟

ج/ على حد علمي هما كانوا اصدقاء.

س/ وما هي معلوماتك بشأن الواقعة محل المحضر رقم 8809 لسنة 2017 جنح مركز الجيزة؟

ج/ حسن راتب طلب مني التوسط للحصول على أمواله من علاء، وأنا كلمت علاء وقابلته في بيته في الشيخ زايد وقولت له الدكتور حسن بيقول له مديونية عليك بقيمة 3 ملايين دولار كان مديهوملك علشان توصلهم لأميرة سعودية، وعلاء ساعتها قالي دى مش ثلاثة مليون دولار هما كانوا حوالي 16 مليون جنيه الدكتور حسن إدهاملي لتجارة آثار ومش فلوس أوصلها للأميرة زى ما قالي الدكتور حسن.

وبعدين رجعت للدكتور حسن أبلغه بنتيجة المقابلة مع علاء ولما قولته باللي حصل الدكتور حسن استنكر كلام علاء إن دی فلوس آثار وأصر على رأيه إن دى فلوس شغل وانفعل وقعد يشتم علاء إنه إزای پتهمه الاتهام ده، وتمسك الدكتور ساعتها بإن علاء أقر إنه له عنده فلوس أمامی وطلب منی الشهادة في النيابة في القضية اللي رفعها الدكتور حسن على علاء، وأنا أصريت أمام الدكتور حسن إنی لو شهدت في النيابة هشهد بكل اللي حصل ومش هجتزأ الشهادة وتحديدا موضوع إن دی فلوس آثار.

واتفقت مع الدكتور حسن وعلاء على طريقة لسداد المبلغ اللي هو أقر بيه علاء (16 مليون جنيه) عن طريق عمارة يمتلكها علاء في المهندسين وإنه يبيعها للدكتور حسن أو يبيعها لمشتري والدكتور حسن ياخد فلوسه، وأخدت صورة العمارة والعقود الخاصة بالعمارة واديتها للدكتور حسن ولما شافها وبحث فيها قالي إن علاء لا يمتلك العمارة وإنه توكيل بالإدارة فقط، وبعدها تدخلت جهات وأشخاص أخرى لحل النزاع القائم بين علاء والدكتور حسن وانتهت القضية بالصلح بينهما.

س/ ومتى كانت تلك الواقعة على وجه التحديد؟

ج/ في غضون عام 2017 ومش متذكر إمتي بالظبط.

س/ وما هو سبب تدخلك للوساطة فيما بين المتهم حسن راتب والمتهم علاء حسانين آنذاك؟

ج/ الدكتور حسن هو إلى طلب مني اتدخل علشان أرجعله فلوسه وتدخل ناس كتيرة غيرى للحل بينهما.

س/ وبماذا اخبرك المتهم حسن راتب بخصوص تلك المبالغ المستحقة له انذاك؟

ج/ هو الدكتور حسن أبلغني إنه بيعمل مشروع كبير في السعودية مع أميرة وإنه سلم علاء 3 مليون دولار يوصلهم للأميرة ولكن علاء موصلش الفلوس للأميرة.

س/ وهل تقابلت مع المتهم علاء حسانين عقب ذلك للوساطة بينهما؟

ج/ أيوة أنا قابلت علاء في بيته في الشيخ زايد.

س/ وهل استفسرت من المتهم علاء حسانين آنذاك عن طبيعة تلك الأموال وخاصة مشروع الآثار المنوه عنه بمعرفة الاخيرة؟

ج/ أنا ساعتها لما علاء قالي إنها فلوس آثار اندهشت واستغربت جدا إزاى الاتنين بيتاجروا في الآثار وروحت بلغت الدكتور حسن بالكلام ده فورا.

 

س/ وماذ كان رد فعل المتهم حسن راتب تجاه ما ابلغته به على لسان المتهم علاء حسانين؟

ج/ هو الدكتور حسن أنكر الكلام اللي انه بلغته به وانفعل وثار جدا وقعد يشتم في علاء انه ازای يقوله عليا الكلام ده.

 

س/ وما الذي حدث عقب ذلك؟

ج/ هو الدكتور حسن لما رفع القضية على علاء واتهمه بالنصب عليه طلب منى الشهادة في القضية بالللى حصل ما بينا وانا ساعتها قولت للدكتور حسن اني لو هشهد هشهد باللي دار قدامى ومش هجتزأ الشهادة وساعتها الدكتور حسن زعل منى فترة.

س/ وما الذي دعا سالف الذكر إلى أخذ موقف منك آنذاك؟

ج/ علشان هو طلب مني الشهادة بخصوص إقرار علاء استلام المبلغ المالي فقط وأنا أصريت إنی أقول إن علاء قالك إنها فلوس آثار بينهم وليست مبلغ مالي محول للسعودية.