معارضين على ما تفرج

ابانا الذى فى المهندسين : ياناصر متدخلش حمار" الديمقراطية " بنا

ناصر عبد الحميد يركب حمارة الديمقراطية تعليقا على قرار التجميد والفصل من العمل

أبانا الذى فى الزمالك ايمن نور خده تور تضامنا مع علقة بلال

دى صورة لبلال مضروب علقة بس دى علقة تانية غير بتاع ايمن نور بس كانت بسبب ايمن بردة

كتب -كريم البحيرى
اخترت عنوان " معارضين على ما تفرج " لأن فعلا فى ناس من المعارضة المصرية وطبعا مش كلهم بقوا عنصريين وديكتاتوريين ذى حكومتنا الغراء مش بس كدا لا دول بقوا يستخدموا نفس سياسة الحكومة فى التعامل مع معارضيها ولأنى مش عايز أأقول كلام فى الهوا هبدأ بالوقائع
أسامة الغزالى حرب رئيس حزب الجبهة رجل سياسى من الطراز الأول حسب رؤية البعض الا انه فى حقيقة الأمر يجب ان يخرج من خانة المعارضة هو ومارجريت عازر القيادية بالحزب لأنهم بقوا زى النظام فى التعامل مع معرضيهم داخل الحزب وعلشان محدش يتهمنى بتفتيت المعارضة والكلام الخايب بتاع انى أمنى أو محسوب على الحكومة هقول واقعة تثبت كلامى وهى انه فى يوم من الأيام ياسادة ياكرام فوجىء ناصر عبد الحميد أمين الشباب بالحزب وطبعا اللى من ضمن القلة المندسة بقرار تجميده من الحزب لأنه أعترض على سياسة أسيادة فى شئون السياسة الحزبية وطريقة تعاملهم مع بعض الأمور التنظيمية اللى مش هخوض فيها لأنها شأن الحزب لكن لأنة عارض الكبار فبدل ما يعاملوا أنتقاده بديمقراطية حسب لوائح الحزب وحسب طلباتهم فى النظام المصرى أنه يبقى ديمقراطى لأ قاموا مجمدين نشاطة مش بس كدا لأ دول اديلو " شقلطة " جامدة لأن مش كفاية طبعا تجميد نشاط الواد اللى من القلة المندسة دا لأزم نقطع رقابتة وطبعا حرب وعازر سيد من يقطعوا رقبة ناصر الغلبان تخيلوا عملوا أيه البهوات حرضوا رؤساء ناصر فى المنظمة اللى بيشتغل فيها علشان يفصلوا وطبعا لأن حرب وعازر واصلين للمسئولين فى منظمة فريدريش نومان اللى شغال فيها ناصر سمع المسئولين كلامهم وقاموا فصلينه ودا يدل على أن قيادات حزب الجبهة ومسئولى منظمة نومان مينفعوش يتكلموا ويتشدقوا علينا بالديمقراطية لأنهم أبعد عنها
مش دى بس الواقعة الوحيدة اللى حصلت ضد معارض من القلة المندسة تجرا وعارض أسيادة داخل حزب فأبانا أيمن نور الملقب بزعيم حزب الغد صعب عليه نفسه من أن عيل زى بلال دياب من القلة المندسة يعارضة داخل الحزب ويقول أنه بيوقع على اجتماعات اللجنة العليا فى الحزب بأسمة وبأسم زوجتة جميلة اللى على خلاف معاه دا غير أنه حرض واحد من لجنة الحكماء للتصويت لصالح قرارات حزبية رغم ان لجنة الحكماء مش من حقها تصوت ولا حتى تزغرط وطبعا لأن بلال عارض اسيادة اللى المفروض معصوميين من الخطيئة لأنهم فوق البشر قام الأخ الزعيم المفدى أيمن نور حسب بلاغ دياب للنائب العام بوز بلطجية علشان يدوا بلال علقة محترمة وقد كان قفشوا الواد فى وسط القاهرة وهاتك ياعزق لحد ما علموه الأدب ولأن الواد دياب دوا واد سوسا مسكتش فصيح وفضح نور يسكت نور لأ طبعا قام البية محول الغلبان دياب للجنة تحقيق وأتهمة ان كان بيشرب مادة مخدرة ممكن تطلع بانجو أو مانجو أو حشيش أو يمكن برسيم مش بس كدا لأ دا الواد الحشاش بلال كان بيشربها فى المقر المقدس بتاع سى أيمن فى المركز الأعلامى الكائن بشارع شريف حلوة الكائن دى ما علينا المهم بقا أن الزعبوط بلال بينتظر مصير فصلة من الحزب
بعد الوقائع دى بقا ياسادة ياكرام ينفع نقول عليهم معارضة أنا راضى زمتكم ولا أنتم ذمتكم زى أنا والقلة المندسة ذمة كوتش ومسلمين ودننا لحزب ملناش دعوة وسيب الملك للمالك والناس طبقات منهم الأسياد واحنا العبيد اللى لأزم يطلعوا عنيهم علشان يعيشو وبعدين سايق عليكم النبى مهما كانت ذمتكم بلاش يطلع عليا الناس بتوع عاش الملك مات الملك ويقلولى مينفعش الكلام اللى انت كاتبة وبلاش تشمت النظام فينا ودول معارضة بردة والكلام الأهبل اللى ميجبش همه دا لأن المعارضة لو بالشكل دا يبقى المعارضين الشرفاء بتوع المبادىء والكلام المكلكع دا يروحوا يشفولهم تربة يتحطوا فيها لأن دا مش ذمانهم دا زمن شلوت سعادتك دفعة للآمام وعموما علشان محدش يشيل منى شلوت سعادتكم جميعا ياسيادنا دفعة للآمام أو للخلف مش مهم المهم أننا هنستنى شلوت سعادتكم وهنقول مهللين فارحين عاش الملك مات الملك وليذهب المعارضين الشرفاء بتوع الكلام المكلكع عن الديمقراطية والحرية الى ترب الغفير يدفنوا فيها لأنها الترب الوحيدة اللى أعرفها بصراحة
اللى عايز ااقولة بقا قبل منهى المقال المخروب دا اللى خنقنى لان فيه سيرة أبانا المقدس الذى فى الزمالك وأبانا الكائن يخرب بيت الكائن دى ما علينا أبانا اللى فى المهندسين مع أنى كان نفسى ألاقى أبانا فى العشوائيات اللى الناس طلعان عين امها وأبوها وخالتها وعمتها وجارتها فيها ماعلينا من العيلة الملعبكة دى ارجع واقول اللى خنقنى ان الواد ناصر دا واد مجنون ومصدق تخيل ان أبانا اللى فى المهندسين اللى بيتكلم عن الليبرالية ممكن يسمحلة ينتقده دا عند ام طارق وطبعا محدش يفهمنى غلط دى مش مرات أبو طارق بتاع الكشرى دى واحدة تانية عموما الواد ناصر دا يستاهل قطم رقابتة ورقبت اللى فى الشارع بتاعة كمان واللى يساندة اما بقى المعلم اللى اسمة بلال افتكر انه علشان قال بقين حمضانيين لنظيف اللى فى حكومة الكوسة وعلشان نظيف اتحرج رد عليه أفتكر ان أبانا اللى فى الزمالك ممكن يرد عليه بينى وبينكم العيال دى عايزة مش علقة وفصل من الحزب وأكل العيش لا دول عايزين نحطهم فى المعتقلات علشان يبطلوا يتنططوا ويفتكروا ان كلام الكتب بيجيب همه وان الشعارات بتاع أبائنا فى اللى فى المهندسين وفى الزمالك ممكن يطبقوها على نفسهم ياخى كررررررررر مش هقدر ااقول كلام بذىء علشان الرقابة مش الرقابة بتاع الافلام لا دى رقابة المهندسين والزمالك اللى ممكن تخلينى احصل بلال وناصر وانا بينى وبينكم غلبان ومفصول من شغلى وأبائنا مش هيلاقوا حاجة يعملوها وبما ان الضرب فى الميت حرام فهلم نفسى احسن