رامز عباس ياكتب يابختك ياريس يانهب بلدنا

يا بختك يا ريس يا ناهب بلدنا
ومن الغلب مات كتير من ولادنا
يا بختك ياريس بتسافر فرنسا
وف بنوك سويسرا بتهرب فلوسنا
عرق عمال المصانع وفلاحين بلدنا
ومكافأة تعبنا فشل فى أكبادنا
يا بختك يا ريس يا ناهب بلدنا
والدستور بيمشى على غير ودادنا
وبتفصلوه لمقاس الوريث
وحجة ده كله أنه برقبة ولادنا
يا بختك يا ريس ياجنرال طيران
وإسرائيل حبيبتك وعدوك إيران
وتصبح فى مصر تشرد كمان
من صدر ولادها شعور الأمان
وتقلق منامهم فى كل مكان
يا بختك يا ريس يا عميل أمريكان
وليلك نهارك عايش قلقان
ومدى لأمن الدولة كدة الودان
تخلى مشاعرك مخاصمة الأمان
يا بختك يا ريس مكروه من القلوب
ويوم بس واحد يفتكروك يا دوب
ده يوم العلاوة بتقول هديهلكم
وتانى يوم بتيجى تستغفر تتوب
كأن اللى خدها شعب له ذنوب
وتنسى أنه كافر بعهدك خلاص
وفلس وطلق وعيشته خراب
ومات منه ناس أكلهم غراب
ومات منه ناس فى عيوب عبارات
يا بختك يا ريس وبختك كمان
دى كلمة فى زورى بقالها زمان
ونفسى أخرج ويكون فى أمان
خسارة أنه ساعت منقول الكلام
بتطلع عساكرك وتموت ولادنا
فيا بختك يا ريس يا ناهب بلدنا