مدونة عمال مصر تنشر نص الحلقة الممنوعة لأحمد فؤاد نجم

نسخة من نص الحوار نشرت بجريدة صوت الامة وللتوضيح بسبب خطأ تم وضع اسم زميل بالجريدة بدلا من وضع اسم محرر الموضوع الاصلى وهو كريم البحيرى

نص الحوار

فى حلقة تلفزيونية ممنوعة
احمد فؤاد نجم يفتح النار على السادات ومبارك ويؤكد قتل عبد الناصر على يد طبيبة الخاص
مبارك قال انه جاى يقضى على الفساد لكن دلوقتى بيقود المفسدين
و مين احمد عز دا اللى يكسب 40 مليار جنية فى السنة والناس بتموت على العيش الحاف

ولو دورتى هتلاقية صاحب ولى العهد

اللى معاه مليون
جنية فى بلد مش لاقية العيش الحاف يبقى حرامى وانا لو كنت غنى كنت هبقى وسخ ومقولش الكلام اللى بقولة دلوقتى
نجم : لو انا ماشى وانتى سألتينى انت اسمك ايه هقولك احمد فؤاد نجم بتشتغل ايه ياعم نجم ااقولك بتشتغل شاعر تقوليلى ديانتك ايه هقولك وانتى مال أمك

واقول لأشرف زكى متبقاش اهطل مصر طول عمرها هليود الشرق

كتب – كريم البحيرى
فى حلقة تلفزيونية ممنوعة فتح احمد فؤاد نجم النار على الرئيس الراحل انور السادات والرئيس الحالى محمد حسنى مبارك وأكد ان عبد الناصر قتل على يد طبيبة الخاص
كان برنامج " ضد التيار " على قناة روتانا سينما قد استضاف نهاية العام الماضى الشاعر الكبير أحمد فؤاد نجم فى حلقة اثارت الجدل وصلت الى حد منع الحلقة من البث على التلفزيون وبعد عام من المنع استطاع البعض تسريب الحلقة وبثها على شبكة الانترنت مدونة " عمال مصر " حصلت على نسخة من التسجيل وايمانا منا بأنه ليس هناك ما هو ممنوع على المواطنيين ننشر تفاصيل الحلقة المثيرة للجدل والذى كشف فيها نجم اخطر الامور
تبدأ الحلقة بسؤال للمذيعة حول الرئيس عبد الناصر وهل قتل كما اشار نجم من قبل ؟ واتى رد نجم كقنبلة مدوية حيث قال انه بكى على عهد عبد الناصر رغم بلاويه السودا اللى عملها واحنا دلوقتى مش لاقين مسمار فى جزمتة ولم اشعر بقيمتة متاخر ولكنه اخف واطئة من البلاوى السوداء الموجودة الان
المذيعة " التاريخ ليس لعبة وكل شخص يقول شىء يجب ان يحاسب لقد اخضعت التاريخ لاحساسك لما قولت ان عبد الناصر قتل على يد طبيبة الخاص وقولت ان سعاد حسنى قتلت لانها عندها اسرارعلى الدولة المصرية ما هو دليلك ؟
نجم " نعم عبد الناصر قتل على يد طبيبة الخاص الدكتور على العاصى والذى كان عميلا لاسرائيل اما عن سعاد حسنى اكيد قتلت وياريت تبصوا ازاى جندها صفوت الشريف وعن مصدر معلوماتى فهى من المنبع فقد كان الدكتور على العاصى عميد معهد العلاج الطبيعى فى القاهرة بجانبى فى زنزانة واحدة وكان على يقوم بعمل العلاج الطبيعى لعبد الناصر وبعد مقتل عبد الناصر تم القبض عليه واثناء زيارة بيجن لمصر قال لى على العاصى اشوف وشك بخير وكان واخد اعدام فسئلتة هل ستنفذ الاعدام غدا فقال لا انا باىباى فسئلتة ازاى فقال لى الراجل بتاعنا جاى بكرة اصلهم رجالة مش بيتخلوا عن رجالتهم زى الامريكان دا دول رجالة
المذيعة " ماذا حدث لك مع السادات قلت علية شعبان البقال ووصفتة بغول انتيكة لون الليل والهوا وقولت عليه المجنون ابو برقوقة وزبيبة عيب ياعم نجم هل يستحق السادات كل الشتيمة دى مش فاكرلة اى حاجة عملها ؟
نجم " دى مش شتيمة دا شوية انا نفسى اطلعة من قبرة واقتلة بأيدى وانا فاكر الوكسة اللى حطنا فيها دلوقتى اللى فيه كل العرب دلوقتى اللى عملة السادات !!
المذيعة " ازاى مش فاكرلة حرب اكتوبر ؟ افتكرله انه كان صاحب المبادرة وقرار النصر؟
نجم " نصر ايه هو كل حاجة يسرقوها ولا ايه واحد يقول الضربة الجوية الاولى والتانى يقولى بطل الحرب والحرب والنصر اللى جابة العساكر والضباط ولادنا وبعدين ادى حرب اكتوبر حصلت وانتصرنا فيها تعالى بقى بصى على الشعب المصرى فى الشارع وقوليلى دا شكل شعب منتصر سرقوا النصر احنا بنموت بعض على العيش والشعب اللى حارب وهزم اسرائيل وامريكا بيموتو بعض على الرغيف الحاف سادات مين ومبارك مين دول .......
المذيعة " كنت عايز السادات يعمل ايه يكمل الحرب لما يقضى على اخر جندى مصرى ؟
نجم " محدش قال كدا مين اللى قال الكلام دا حرب ايه انا بس عايز اعرف مين قالة يعمل سلام منفرد مع اسرائيل احنا كان معانا السوريين ازاى يروح يعمل سلام منفرد ؟
المذيعة " قولت فى قصيدة البتاع انك تنبأت بمقتل السادات ؟ فى اى جزء ذلك ؟
نجم " ايوة قولت : ادى اللى جابة البتاع جاب الخراب مشموم لان حتة بتاع مخلب لراس الغول باع البتاع بالبتاع وعلشان يعيش علطول عين حرس للبتاع وبردة مات مقتول
المذيعة " اية هو بقى البتاع ؟ انت استخدمت لفظ ممكن يكون عند بعض الناس بذىء شوية ؟
نجم " لا مش بذى البتاع دا مفردة عبقرية مش موجودة فى اى لغة فى العالم وقصدت فى جزء من القصيدة بالبتاع اى الانفتاح الاقتصادى لان مفيش رئيس جمهورية يقف يقول اللى مش هيكسب على ايامى عمره ما هيكسب دا منطق ..... مش رئيس جمهورية اللى يقول اللى مش هيكسب على ايامى عمره ما هيكسب واكسب زى ما انت عايز طالما هتدينى حقى !! حقى ايه بس دا ممكن يكون رئيس جمهورية ؟ وهاتوا شريطة واسمعوها مش ممكن دا يكون رئيس مصر
المذيعة : انت قولت مين يقدر ساعة يحبس مصر فهل فى رئيس من الرؤساء الثلاثة قدر يحبس مصر ؟
نجم : اه الموجود دلوقتى بس دا مؤقت لان الحالة اللى فيها مصر حالة مؤقتة وشكرا للرئيس حسنى مبارك انه خلى الناس يصحوا
المذيعة : انت متحامل جدا على الرئيس حسنى مبارك ولو كانت الكلمة سلاحك ياعم نجم والكلمة هى اللى بتهاجم بيها النظام وبتهاجم بيها الشخصيات وبتهاجم بيها الاوضاع فى مصر ممكن بالكلمة دى كنت تقدر تتحاور بيها مع النظام والشخصيات بما فيهم الرئيس محمد حسنى مبارك ؟ وكان رد نجم اتحاور هو انا بشوفة وتعود المذيعة لتسأل انت تقدر لو عايز تشوفة هتشوفة؟
نجم : مين اللى قالك الكلام دا هو الرئيس حسنى مبارك حد يعرف يشوفة هو فى حد يعرف هو بينام فين وبعدين انتى بتسئلينى انى اطلب من مكتبة انى ااقابلة تقدرى تقوليلى فين مكتبة دا الرئيس حسنى مبارك اول ما جه انا كنت متفائل بية جدا لانه قال انى جاى علشان ااقضى على الفساد ومحدش فوق القانون لكن دلوقتى هو بيقود الفساد
المذيعة : انت لم تهاجم الرئيس المصرى غير مؤخرا يعنى طول 18 سنة تقريبا متكلمتش ؟ ولية متمش اعتقالك بالرغم ان القانون بيعاقب اى حد بيسب اى حد بيتعاقب؟
اولا انا لم اهاجمة لانى كنت مصدقة لكن انا مشتمتوش انا بطلب منة انه يبقى راجل ويبقى مسئول عن كلمتة لما قال انا جاى علشان ااقضى على الفساد والمفسدين وانا ايدى نضيفة ولسانى عف انا بطلب منة دا لان دا حقى لاننا اصحاب البلد مش سياح وهو هيجى ويمشى لكن الشعب المصرى هو اللى قاعد وهيشيل الطين
المذيعة : الرئيس محمد حسنى مبارك سابك حر طليق ولو كنت فى عصر السادات او عبد الناصر كان زمانك فى السجن ؟ والراجل سيبك حر طليق لانك فى نظام ديمقراطى؟
نجم : اولا منا اتحبست حصل ايه وبعدين نظام ايه اللى ديمقراطى انتى بتضحكى عليا ولا بتضحكى على نفسك البلد كلها مسجونة
المذيعة : انت قولت ان شالة يجى مين ان شالة يجى اليهود بس يخلصونا من اللى موجودين ؟
نجم : ان شالة يجى الهنود الحمر يخلصونا من العصابة دى دى مش حكومة دى تشكيل عصابى يابنتى دا تشكيل عصابى لما واحد اسمه احمد عز يكسب فى السنة 40 مليار جنية ازاى يعنى الناس اللى فى البلد مش لاقين الطعمية ازاى ومين احمد عز دا ويقرب لمين هتلاقية صديق الباشا ولى العهد وهتلاقى غيره وغيره والرجال بتاع السيراميك دا ايه دول الناس دى طلعت امتى وعملوا الثروات دى منين واحنا مش لاقين العيش الحاف الناس بتموت علشان العيش الحاف
المذيعة : لو كنت طلعت غنى كنت هتقول نفس الكلام دا ؟
نجم : لو كنت طلعت غنى كنت هبقى وسخ مقولش الكلام دا غنى يعنى حرامى لان فى بلد مش لاقية العيش اللى معاه مليون جنية يبقى حرامى
المذيعة : هل انت ضد او مع قرار اشرف زكى نقيب الممثلين بعدم عمل الفنان العربى فى مصر فى السنة اكثر من عمل واحد؟
نجم : انا ضد دا طبعا وبقول لاشرف زكى فوق متبقاش اهطل لان مصر طول عمرها كانوا بيقولوا عليها هليود الشرق هو فريد الاطرش واسمهان كل الفنانيين العرب اشتغلوا فين ؟ مصر دى مش ملك حد ولما هو والمقصود اشرف لما يقول كدا يبقى هندخل فى حدوتة بقى مصر بتاع مين بتاع المسيحيين ولا بتاع المسلمين ايه دا مصر اكبر من الكلام دا مصر اكبر من الكلام دا عيب بقى
المذيعة : انت ضد ولا مع حذف خانة الديانة من البطاقة ؟
نجم : دى لازم تتحذف لان دا عملها الاستعمار التركى الملعون وبعدها الاستعمار الانجليزى يعنى لو انا ماشى وانتى سألتينى انت اسمك ايه هقولك احمد فؤاد نجم بتشتغل ايه ياعم نجم ااقولك بتشتغل شاعر تقوليلى ديانتك ايه هقولك وانتى مال أمك انت مالك ومال ديانتى دى علاقة بينى وبين ربنا
المذيعة : انت ضد او مع السيدة المأذونة ؟ وهل انت ضد او مع عملية التحول الجنسى ؟نجم : انا مع السيدة ان تكون مأذونة وبخصوص التحول الجنسى انا مع لانى مع العلم علطول