رسالة من معتقل سابق الى من يدعون انهم نجوم 6 ابريل

محاولة ارتداء ثوب البطلة والنجمة واسع عليكى ياسراء

كتب - كريم البحيرى
بصراحة وبما انى احد المعتقلين فى 6 ابريل الماضى فكان لازم ارد على مهزلة تقرير صحيفة اليوم السابع اللى جه تحت عنوان بالبنط العريض واللى يزغلل العيون

نجوم إضراب 6 أبريل 2008 متشائمون ويشككون فى نجاح إضراب 2009

وبينى وبينكم رغم انى عارف ان الموضوع اساسا اتفه من انى ارد عليه لانى بعمل للمتحدثين فيه اسم لكن انا عايز ارد لاسباب هحتفظ بيها لنفسى
اولا انا برد على احمد نصار ودا كان معايا فى زنزنزانه واحدة فى برج العرب وهرد بردة على اسراء عبد الفتاح
اولا احمد نصار دا هو اللى كان الشهر قبل الماضى قد وافق على السفر لحضور مؤتمر تنظمة الخارجية الامريكية واللى اساسا هى بتصدر اومر بقتل اخواتنا فى فلسطين وغيرهم وهى السبب فى بلاوى العالم دلوقتى بسبب سياسات الله يجحمه بوش واللى يفتكر ان اوباما خير من بوش يبقى بيحلم لان دى سياسة دولة وعموما مش هو دا موضوعنا
لكن اعتقد اللى يقبل يروح ويحضر مؤتمر تنظمة الخارجية الامريكية مينفعش يبدى رأية فى حاجة تخص ناس مطحونة ومش لاقية تاكل لأنه اكيد مش هيحس بيهم ولما يروح الاول يبطل يتعامل مع الحكومات يبقى يجى يقولنا رأية
أما الأخت اسراء عبد الفتاح واللى الكل عملها بطلة ياريت تبقوا تسئلوا بس الناس اللى كانوا محبوسين معاها هى لية كانت بتعيط طول فترة الحبس واللى هيقولى دى اول بنت تعتقل واتبهدلت والبنت مش زى الولد هضربة بالجزمة لان فى سيدات كتير اتشرف بأنى اكون خدام ليهم اعتقلوا وتحملوا مصائب الاعتقال لأيمانهم بقضية ولا سمعنا عن واحدة فيهم عيطت ولا واحد فيهم طلعت اعتذرت لوزير الداخلية بعد دقائق من الافراج عنها واقرب حاجة شوفوا نادية مبروك دخلت السجن فى نفس القضية فى احداث 6 ابريل واتحبست تقريبا نفس مدة اسراء ورغم كدا خرجت ومتغيرتش بتحضر المظاهرات ولسة لسانها طويل زى ما هو على كل واحد فاسد فى البلد دى وبيظهر دا فى تقريرها الصحفية وكمان الدكتورة كريمة الحفناوى اللى بيتقبض عليها كل مرة وعمرها ما عيطت او ندى القصاص اللى كل يوم بشرف انى اعرفها لانها من اقوى المعارضات لنظام مبارك الفاسد ولا يوم عيطت لما اتقبض عليها ولا اعتذرت لوزير الداخلية
وانا بصراحة هقولكم على حقيقة اسراء واحمد نصار لية هما رافضين فكرة الغضب الشعبى
اولا احمد نصار ممكن يتعامل مع اسرائيل لو فى سلام حتى لو كانوا بيقتلوا فى الفلسطنيين تحت مبدأ اننا لازم نعرف اعدائنا ودا اللى قالوا لما كان رايح امريكان قال بالنص احنا رايحن نقولهم وجه نظرنا انهم عندهم فساد قال يعنى الخاريجة الامريكية مستنية نصار يقولها انهم فاسدين وغيره من الحاجات اللى حفظها ليه حزب الغد عن الحرية والسلام واسراء بردة لا تختلف عنه بتعمل فيها مناضلة وبتكتب مقال تحت عنوان ثقافة الاضراب العام واعتقد انها اساسا عمرها ما قرأت كتاب بيتكلم عن الاضرابات او الثورات فى الدول الاخرى او ادعى انها اساسا عمرها ما عرفت ان فى ناس عايشة فى عشش كفاية هى صحيح عايشة فى بيت كبير فى منطقة الفيلل ببنها ودلوقتى شقة فخمة بمدينة بدر وراكبة عربية ثمنها يحل مشكلة عدد محترم من الشباب اللى عايزين يتجوزوا ومش لاقيين شقق وفى ناس اساسا معندهاش بيت تقعد فيه
لكن الاهم بقا ان سبب رفض الاثنين لفكرة الغضب الشعبى هو مش خوفهم - زى ما الاستاذة الصحفية نورا فخرى ما هى كاتبة بالعنوان الغريب دا واللى يدل انها متعرفش اى معلومات عن 6 ابريل وبتستقى معلوماتها زى كتير من الصحفيين من اللى بينشر فى الصحف
لكن الحقيقى فى رفض الاثنين ورفض كل اللى فى حزب الغد هو ان ايمن نور اللى كل مصر دافعت عنه خرج من السجن بيحاول يعمل فيها سعد زغلول وبيقول انه هيوقع حاجة اسمها اعلان القاهرة اعتقد بردة هو دا ايمن نور اللى وافق انه يكون رئيس وزارء فى حكومة الابن المدلل جيمى " جمال مبارك " واعتقد بردة هو ايمن نور اللى اتربى فى حضن امريكا واعتقد بردة هو دا ايمن نور اللى بيتلكم عن الرأسمالية رغم البلاوى اللى جتلنا من وراها والازمة العالمية المالية الطاحنة اللى خلت ناس تنزل تحت خط الفقر وتختفى واعتقد ان كل مصر رافضة التوريث الا طبعا ايمن نور عنده استعداد يوافق على شرط يكون رئيس وزارء
اريد ان اقول الى ايمن نور لو افتكر ان فوزة بشكل كاسح فى انتخابات الرأسة له علاقة بأنة زعيم يبقى غلطان هقولك الحقيقة اللى يعينى انت عارفها لكن بتخبيها على نفسك ياسيد ايمن الناس انتخبتك لان مكنش فى بديل غيرك لانهم اتخنقوا من الاخوان اللى بيتكلموا عن الاخلاق والنقاب فى الوقت اللى الناس مش لاقية فية لقمة عيش وكمان مكنش فى حد مترشح من الاخوان ورغم اختلافى الكلى والجزئى مع الاخوان الا انى اعتقد ان لو كان حد منهم اترشح ادامك مكنتش خدت صوتين على بعض واخيرا طبعا الناس انتخبتك لانها مش طايقة مبارك او ابنه وبردة لان كان كل المقدمين لانتخابات رئاسة الجمهورية شوية كومبارس وانتى كنت الوحيد اللى مكنش حد يعرفة وكان بيتكلم بشكل قريب من الناس " كانوا من الاخر مخدوعين فيك " ياسيادة رئيس وزراء حكومة جيمى
نرجع لاعلان القاهرة ايمن نور بقا جاب اسراء وعملها مديرة الاعلام وطبعا دا بمرتب مجزى وجاب كام شاب من اللى مش لاقين شغلانه وعملهم بهوات ببدل وطبعا لزم يردوا الجميل انه يبقوا معاه فى فكرة لا للاضراب او الغضب الشعبى وياريتكم تبصوا على اعلان القاهرة اللى ايمن بية بيقول فيها ان الحكومة لو ماستجابتش الحكومة للمطالب هيبقى فى دعوة للاضراب فى 2010 وافتكر نفسة سعد زغلول فكرنى بواحد فى شركة غزل المحلة كان كل لما بيتكلم يقول انا بصبعى اخلى الشركة تضرب وبصابعى اخليها متضربش ولما اترمى برة ملاقاش حد يضرب علشانة مش عارف العنجهة بتاعته راحت فين وبردة يادكتور ايمن يبتاع الدكتوراه بألف دولار من برة واللى عايش فى فيلا احدث موديل وراكب عربية زى الفل ربنا يزيدة ياريت تبطل تستخدم الشباب
اخيرا بقى لو الناس عايزة تعرف مين نجوم 6 ابريل الحقيقيين انا هقولهم
النجم الاول : المواطن المصرى الذى شارك فى الاضراب بدون هدف
النجم الثانى : اهالى مدينة المحلة الكبرى
النجم الثالث : كل مواطن صمد فى الاعتقال ولم يتراجع او يغير افكارة او يقل حماسة فى محاربة النظام الفاشل نظام مبارك
النجم الرابع : ساكنى العشش فى مصر المنكوسة والمنحوسة
النجم الخامس : معتقلى 6 ابريل فى سجون مصر وطبعا نصار واسراء مش منهم
فى ناس كتير مثل
الدكتور عادل العطار طبيب بالتأمين الصحى بدمنهور وعضو بحركة كفاية وكان يطلق عليه شيخ المعتقلين
عصام جويدة مرشح مجلس الشعب والنائب الشرعى فى الدورة الماضية رغم تزوير الانتخابات وكان يلقب بعمدة معتقلى 6 ابريل
احمد امين الصحفى بجريدة الكرامة واحد اقوى من قابلتهم والذى قال لضابط امن الدولة داخل السجن عندما طالبه بالتوقف عن التظاهر ضد الحكومة وان يدير باله على اهله فكان ردة لن اتوقف عن المطالبة بحقى فى حكم مبارك السىء وكان من اقوى من قابلتهم فى حياتى
الدكتور محمد عوض طبيب من المنصورة ناصرى الفكر وعضو بحركة كفاية ومن اقوى المهاجميين للنظام المصرى وتكبد العديد من الاضطهادات ولم يرضخ
محمد الاشقر رجل عمره يناهز الستين وتعرض لكثير من الاضطهاد ورغم ذلك ظل صامد وعضو بحركة كفاية
محمد عواد عضو بحركة شباب 6 ابريل ومن اقوى المهاجمين للنظام المصرى ورغم اختلافى فكريا معه الا انى اقدره واحترمة لانه من الذين لا يرضخون مهما كلفهم الامر
وغيرهم من الشخصيات الكبرى والشباب الكثير وايضا
كمال الفيومى عامل فى غزل المحلة كان من اقوى من قابلتهم حيث تحمل الصعاب داخل المعتقل رغم سوء حالتة واصابتة بقىء دموى نتيجة الاضراب عن الطعام
طارق امين عامل فى غزل المحلة رغم بعده عن اولاده الا انه كان صامدا
مصطفى النوبى شخص ليس له علاقة بالسياسة يعيش بالاسكندرية وتم القبض عليه بطريق الخطىء وهو مواليد اسوان ورغم هذا لم يشعر بالخوف وكان يواجه ضباط امن الدولة وتسبب ذلك فى جلوسة داخل المعتقل 40 يوما ورغم ذلك قال وهو يفرج عنه من بابا المعتقل لن اخرج واصبح ضعيفا ولم اكن سياسيا يوما لكن بعد اعتقالى سأصبح سياسيا
وليد صلاح صحفى بجريدة الديار لم يتنازل عن مبادئة رغم اعتقالة وتجده دائما فى اول الصفوف فى اى مظاهرة تطالب بلقمة عيش
ضياء الصاوى رغم اختلافى الفكرى معه الا انه من اخلص الشباب الذين قابلتهم
احمد ماهر ورغم اختلافى الفكرى ايضا معه وهو وشباب 6 ابريل الا انى احترمة لانه لم يخن ولم يتعاون مع ضباط امن الدولة

معتقلى المحلة الذين لم يكن لهم بالسياسة ورغم ذلك لم يتعاونوا مع ضباط امن الدولة ولم يشاركوا فى التخريب
اهالى المعتقلين الذين تحملوا الصعاب لحين خروج ابنائهم ومن لازالو يتحملون الصعاب من من ابنائهم بالداخل ومحكوم عليهم بالسجن
هؤلاء هو الابطال الحقيقيين وغيرهم كثيرين ولكن ليس فيهم ايمن نور او اسراء عبد الفتاح ولا أحمد نصار اعتقد ان كاتب خبر نجوم 6 ابريل يجب ان يراجع عمله ويكتب عن النجوم الحقيقيين ل6 ابريل
وليعلم الجميع لست انا ولا الف مثل اسراء او نصار او غيرهم من نقرر ان كان الشعب سيغضب او لا الشعب من يقرر وهذا ما لم يفهمه بعض السياسيين الحنجوريين من مرددى انه يجب ان يكونوا هم القيادة وان الشعب يجب ان يتبعهم ورغم ما يقلنه لهم الشعب من دروس يومية فى التنظيم بحركاتهم الاحتجاجية والتى تؤكد ان التغير يأتى من القاع وليس من اعلى الهرم الا ان بعض السياسيين العنجهيين مازالو يقولون انهم القيادات
واخيرا سأقول لكم مقولة علمها لى من قابلتهم داخل السجن واساتذتى ومن علمونى كل ما اعرفة اليوم وهى
ان لم تكن مع فلا تكن ضد
اى انه لم اكن مع الغضب الشعبى فلا اكون ضده مثل ما يفعل الان ايمن نور واسراء عبد الفتاح واحمد نصار وغيرهم الكثيرين
شكرا واكتفى بهذا القدر من الكلمات مع احتفاظى بالكثير من الحقائق التى تكشف من يطالبون بوقف الغضب الشعبى فى 6 ابريل القادم وسأحتفظ بها لنفسى
واعتقد ان بعد مقالى ربما اصاب بسيل من الشتائم والاتهامات بالخيانة ولكن ان كان من مثل هؤلاء من يدعون الوطنية وهم اساسا فى صف النظام سائرون جنب الى جنب هذا النظام الذى افقر وعذب الشعب المصرى فاسعتبر شتائمهم وتخوينهم لى وسام شرف مثل ما اعتبرت اعتقالى ب6 ابريل وسام شرف على صدرى افتخر به
ودعونى قبل ان انهى حديثى ان اوجه الى بعض الصحف والصحفيين اللوم
انتم من صنعتم هؤلاء الابطال من الورق واطلب منكم مراجعة دفاتركم والبحث عن الابطال الحقيقيين فى كل المجالات وليس فى من ينشر اسمائهم فى الصحف من محبى البروبجندة
وياصدقائى من زورا المدونة انا لست هنا لاكون حاكم على الاحداث ولكنى هنا كمواطن مصرى ارفض ان يتحكم فى مصيرى بعض من الابطال الورقية