برنامج لتعليم الاطفال القانون والمواثيق الدولية بجمعية حقوق الانسان لمساعدة السجناء

شعار الحملة

شعار الجمعية

بصراحة انا رحت انهاردة المنظمة العربية للاصلاح الجنائى "جميعة حقوق الانسان لمساعدة السجناء" اللى بيديرها الاستاذ محمد زارع وقابلت وقابلت الاستاذ عاطف حافظ المحامى مسئول المركز ودا لانى كنت محتاج ابص على بعض اصدارات المركز واللى بتكون تقارير عن اوضاع السجناء فى مصر وبصراحة دا من افضل مراكز مصر فى التقارير السنوية عن اوضاع السجناء ولكن بصراحة قابلتنى مفاجئة هناك وهى ان فى برنامج لتعليم الاطفال القوانيين والمواثيق الدولية عن طريق القصص ودا اللى انا استغربتلة جدا لكن لقيت الاستاذ عاطف بيشرحلى الحكاية
وقال ان فكرة جات لاحد نشطاء المركز انه يعمل حملة اسمها فريق النشط على ودا على اسم ابنه وراح سجلها فى الشهر العقارى والفكرة بتعتمد على تعليم الاطفال القوانيين والمواثيق والمعاهدات الدولية عن طريق قصص الاطفال ولما سئلتة السن بيبدأ من كام كانت المفاجأة قالى انه بيبدأ من سن 6 سنوات وهنا سئلتة فى حالة استغراب والاطفال بتقدر تستوعب دا قالى دول كمان بينقشوا فية وبيكتبوا فى مجلة باسم الحملة قصص
وهنا ابتسمت وقولتلة بجد فكرة هايلة واحنا محتاجين لدا من زمان ان الجيل الجاى يكون عارف حقة فين علشان الحكومة تبطل تستغفلة وابتسم وقالى ان المركز قابل عدد كبير من الاطفال متحمس للفكرة وان المركز عمل مسابقة مرة عن القصص واللى كان هيتكرم فيها تقريبا 20 واحد لكنهم فوجئوا ان المتقدمين 300 طفل ودا خلاهم يكرموا الاطفال كلها علشان يشجعوهم عن طريق ميداليات برونزية وبعض القصص
بجد انا كنت سعيد جدا انهاردة وخاصة انى طلبت منة اخد بعض النسخ واللى مكنش موجود منها غير الانجليزى ولكن الانجليزى البسيط جدا اللى اى شخص يقدر يفهمة وموجود فى اول كل قصة ترجمة للكلمات الصعبة على الاطفال وبصراحة انا خدت القصص دى وانا بتحجج انى هديها لاختى ايمان الصغيرة تقراها لكن الحقيقة انى هقراها الاول علشان اتعلم منها
بجد انا كنت سعيد جدا بالزيارة دى وبدعوا الجميع يروحوا يزوروا المركز ويشاركوا فى توزيع الحملة دى ودا هيكون هايل اننا كلنا نعلم اولادنا القوانيين بطريقة سهلة وميسرة
وبجد شكرا لاصحاب المركز وصاحب فكرة الحملة على فكرتهم اللى بجد عبقرية
عنوان المركز شارع سرايا الازبكية تقاطع شارع عماد الدين او منزل على الشمال الدور الثالث
موقع الحملة
www.activistali.org
بسرعة كلكم شاركوا فى الحملة بنشرها على مدوناتكم واللى يقدر يروح يعرض مساعدتة يعمل دا بسرعة واتمنالكم يوم سعيد هناك زى اللى انا شفتة
الحملة باللغة العربية
http://www.activistali.org/arabic/index_ar.html

for english
http://www.activistali.org/eng/index_en.html