مبرووووووووووووووك خروج فيليب والى امن الدولة كفاكم عملا لخدمة الموساد الاسرائيلى

فيليب رزق

انا بجد مبسود جدا انا لسة مكلم فيليب رزق دلوقتى وهو كويس ولما سئلتة انت كنت مخطوف فين قالى انه نفسة ميعرفش عموما بجد حمد الله على السلامة لفليب ومبروك علينا كلنا وعقبال الباقى ورغم انى سعيد جدا بخروج فيليب الا انى بردة فى جزء كبير من الحزن دخل قلبى انهاردة للمرة التانية خلال يومين ودا بعد ما الصحفى ساهر جاد بعتلى خبر بيقول ان مجدى حسين اتحكم عليه بعامين و2000 جنية غرامة والحكم صدر من المحكمة العسكرية فى الاسماعلية بعد ما رفضت هيئة المحكمة اقتراب النشطاء حتى من مكان المحاكمة وقبل كدا طردت هيئة المحكمة المحاميين وقالت انها هتوكل محاميين تابعين لها بحجة انها عارفة مصلحة مجدى حسين اكتر من المحاميين

والحكم دا مكنش الاول اول انبارح اصدرت المحكمة بردة حكم على النشط احمد دومة ومعاه نشط اخر من الصعيد بحكم سنة و2000 جنية غرامة

وبجد انا مبقتش عارف هو خلاص قانون الغابة وصل به الانتشار لهذه الدرجة اولا الماحكمة بالطلة لانها لم تتوافر فيها الشرعية ودا لان المحكمة طردت المحاميين ثانيا لان مجدى ودومة ومعاهم نشط الصعيد اللى اسمه احمد بردة اتحاكموا ادام محكمة عسكرية ودا ضد كونهم مدنيين يجب ان يحاكموا امام محاكم طبيعية وثالثا لان الحكم عليهم ظالم ودا لان المفروض دول يتعاملوا كأبطال لذهابهم والتضامن مع الشعب الفلسطينى فى غزة بدل ما يتم معاملتهم كمجرمين

عموما انا مكنتش مستغرب الحكم رغم انه كان جائر اوى بس انا عارف ان قانون اللى بيحكم مصر قانون سكسونية فمش غريبة اللى بيحصل دا

عموما انا عرفت ان النشطاء اللى راحوا يحضروا محاكمة مجدى حسين لسة معتصمين هناك ورافضين يمشوا وبيطالبو بحبسهم مع مجدى

ودولقتى نفسى اسئل بتوع امن الدولة سؤال انتم لية مصريين انكم تخدموا الموساد الاسرائيلى ويمكن البعض يقول عليا مجنون ازاى او بزايد لكن دى حقيقة امن الدولة فى مصر والحكومة المصرية بتخدم الموساد الاسرائيلى ودا واضح من ان المشترك بين فيليب ومحمد عادل واحمد دومة ومجدى حسين واحمد بتاع الصعيد وضياء الدين وغيرهم كتير انهم كلهم كانوا بيتضامنوا مع فلسطين فى الحرب على غزة وطبعا اسرائيل نفسها مفيش حد يتضامن مع غزة وطبعا بكدا امن الدولة والحكومة المصرية بيقدموا احسن خدمة لاسرائيل بحرب كل اللى عايز يتضامن مع غزة وحبسة علشان الشعب المصرى يتلم بقا وبيطل يتضامن مع الشعوب المقهورة

لكن من مدونتى بقدم تحدير للحكومة المصرية ولامن الدولة كفاكم انبطاح للموساد الاسرائيلى وكفاكم اعتقال فى شباب مصر ومخلصينة لاننا مهما فعلتم لن نتنازل عن تضامنا مع فلسطين وحبنا لمصر ومحاربتنا للكيان الصهيونى والامريكى

حتى لو كلفتنا حربنا على هذه الكيانات ارواحنا وليس فقط اعتقالنا

ونحذر امن الدولة والحكومة ان عواقب اعتقال شباب مصر ومخلصين هذا البلد ستتسبب فى كارثة ولن يرحم الشعب الحكومة او امن الدولة اذا ثار على هذا النظام الفاسد ولكم فى انتفاضة الخبر فى 77 وانتفاضة 6 ابريل امثلة وبروفات للانتفاضات الشعبية