رسالة من كريم البحيرى الى كل من ظن انه بالنقل والتحقيق قد كسر

كتب - كريم البحيرى

كتير اوى سئلونى انا لية توقفت عن التدوين خاصة بعد اصدار قرار بنقلى الى القاهرة تعسفيا من قبل المفوض العام لغزل المحلة فؤاد عبد العليم حسان

البعض قال ان قرار النقل كسرنى وان التحقيقات التى تجرى معى خوفتنى وانى لميت الدور ولميت نفسى لانى خايف يتم اعتقالى لو اتكلمت

لا والف لا

السبب الحقيقى وراء توقف التدوين انى بسافر كل يوم من مدينة القاهرة لمدينة المحلة والعكس علشان اروح شغلى ودا طبعا بيخلينى ملحقش اروح اى مكان او اقعد على النت او حتى اخد نفسى ودا السبب ويمكن انا كنت هفضل شوية مكتبش حاجة لحد ما اظبط ظروفى لكن بعد ما وصلنى رسايل كتير على الموبايل وعلى النت فحواها انى خفت من اللى حصل فكان لازم اجى واكتب على مدونتى الحقيقة ومفيش رد على كل اللى بيتقال غير قصيدة من عمنا الكبير احمد فؤاد نجم هرد بيها على كل اللى بيتقال وها هى القصيدة

أنا مصرى
أنا مصرى أبن مصرى وليا الشرف
برغم المهانة برغم القرف
برغم الزبالة اللى مالية الشوارع
برغم الفساد اللى بيه أعترف
سمو معالى رئيس الوزارة
نتيجة موظف بسيط أنحرف

برغم المجاعة اللى داخلين عليها
وفينا اللى عايش حياته فى ترف
برغم البطالة فى أوضة وصالة
برغم أن أخر جنيه اتصرف
برغم طابور الصباح السخيف
وكل منايا يادوب كام رغيف
برغم أسايا لمنظر عشايا
وأقول مش مهم يا واد نام خفيف
برغم إنى شايف بلاوى وساكت
وعايش مطنش كأنى كفيف
برغم وزارة رئيسها حرامي
وشوفوا البجاحة يقولوا نظيف
برغم السلام اللى غرقت بناسها
برغم العيال اللى ساكنة الرصيف
برغم حكومة شعارها الكلام
ورغم رئيسنا عليه السلام
ورغم أن كله يا عالم بيغلى
إلا كرامتى بترخص قوام
برغم إنى عايش في بلدى فريسة
ووجبة شهية لبعض اللئام
برغم أن كل تاريخك يا بلدى
فعهد جنابه كلام فوق رخام
برغم ده كله يا مصر بحبك
وطظ فيهم ودا آخر كلام

اظن ان الرسالة على كل من يظن انكسرت قد وصل ردها من خلال القصيدة وقبل ان انهى كلامى اريد ان اوصل رسالة الى السيد فؤاد عبد العليم حسان والسيدة الوزيرة عائشة عبد الهادى وايضا حسين مجاور رئيس اتحاد العمال الغير شرعى والسيد رئيس النقابة العامة سعيد الجوهرى

ان ما قمتم به من نقل تعسفى وتحقيق مع كل عامل قال لكم لا فى اى شركة فى مصر وخاصة غزل المحلة لا يدل سوا على انكم مجموعة من من استباحوا دم عمال مصر وانكم تريدون ان تتحولوا الى عواد ذلك الشخص الذى باع ارضة ها انتم تكررون مسلسل عواد ولكن ليس كما فعل عواد فقد باع ارض يملكها لكنكم تبيعون ما لا تملكون

ولا تظنوا اننا نخاف او نخشى بطش امنكم الذى حول الدولة الى دولة بوليسية لا

لا نخاف

ولا نرتعب

ولكننا لكم بالمرصاد وما دام فينا نفس لن نصمت على حقوقنا التى نهمبتموها ولن نترك لكم قرشا واحد لنا حق فيه والاشرف لكم قبل ان يأتى اليوم الذى لا مفر منه وهو يوم الحساب ولكنه يوم حساب على الارض وليس فى السماء ارحلوا انتم وحاشيتكم وابلغوا رئيسكم الذى استباح دماء المصريين ان يلملم ما تبقى من الذى سرقة ويرحل قبل ان يأتى الطوفان الذى لا يرحم وهو انتقام الشعب

اما السيد وزير الخصخصة محمود محى الدين

فلى رسالة له

ياسيدى الفاضل اذهب بمقترحاتك الى الجحيم فلسنا نريد من سيادتك او من السيد ابو فكر جديد جمال مبارك اى اقتراحات لتمليك العمال والمصريين اصول القطاع العام فهى بالفعل اموالنا التى سرقتموها طوال السنوات الماضية وقبل ان تملكوا للشعب ما لا تملكوا ان تعطوه لهم حاسبوا انفسكم اولا عن ما تم بيعه واموال الخصخصة التى نهمبتموها

واعلموا اننا لن نكون عواد ولن نوقع على بيع مصر

فلتذهب شلة الحرامية وحاشيتهم الى الجحيم والذى سيتم بناءه هذه المرة بأيدى شعب اهين طوال 27 عاما فاحذروا انتقام شعب مصر فالشعب الذى بنى الاهرامات وبنى تاريخ مصر قادر على ان يبنى محرقة يلقى فيها الفاسدين والمرتشين ومن يريدون بيع ما تبقى من هذا البلد

لن نكون بعد اليوم شعب لا مبالى بل سنصرخ ونقتص حقوقنا حتى لو كانت فى ايدى الرئيس او ابليس