بيان شعبي لتضامن: حول إضراب 6 إبريل

يا أهالينا …. يا أهالينا
العيشة بقت مرة والأسعار مشتعلة كالنار بتحصد في أرواحنا ومرتباتنا ، والحكومة لسه بتبيع لنا كلام ، كان آخره كدبة إبريل : إن مصر لسة بتتقدم بينا ، أي مصر … مصر العشة ولا القصر ! ؟
محدش بقى يصدق الكدبة الماسخة بتاعة حكومة رجال الأعمال ، اللي محدش فيهم ركب اتوبيس ولا وقف في طابور عيش ولا مات له حد في عبارة أو في قطر أو في انتظار العلاج …. محدش منهم يشتغل ويعرق 12 ساعة في اليوم عشان يقبض ملاليم آخر الشهر
27 ألف عامل في شركة الغزل والنسيج هيروحوا الشغل في ميعادهم بس الممكن في المصنع مش هايدور ولا في إنتاج هايطلع ، العمال قرروا يتجمعوا في ساحة المصنع عشان يعلنوا مطالبهم بمحاسبة مجلس الإدارة الفاسد وصرف الحد الأدني للأجور بما لايقل عن 1200 جنيه للعامل ، وصرف بدلات الوجبة والسكن وزيادة الحوافز الشهرية
عمال المحلة يوم 6 إبريل مش بيضربوا عشان مطالبهم لوحدهم ، العمال بيتحركوا عشان البلد كلها ، عشان كل الناس اللي بتعاني …. صوت المحلة بيقول لظلم في بر مصر : علـّي في سـور السجن وعلـّي بكره الناس هاتقوم ما تخلي
بلدنا لسه ولادة وحبلى بالمناضلين، ومش العمال لوحدهم اللي اتحركوا ، اتحرك معاهم 55 ألف موظف في مصلحة الضرائب العقارية وأضربوا عن العمل في كل محافظات عشان يحسنوا مستواهم المعيشي وأجبروا الحكومة على الاستجابة لمطالبهم …. وزيهم في ناس كتير أضربت واحتجت ، العطاشى في البرلس وعمال شركة أسمنت طرة وشركة المطاحن والسويدي للكابلات وشركة الطوب الرملي و الصيادين في الإسماعيلية و لسه الأمل والنضال بيدب في كل شبر من مصر
كل الأمثلة دي بثبت إن الطريقة الوحيدة عشان ناخذ حقوقنا هو التحرك الجماعي المنظم إبدأ في شركتك ، في مدرستك ، في مصنعك ، في قريتك اتكلم مع الناس ونظموا نفسكم ووحدوا صفكم ، إيد بوحدها ما تسقفش …. احكي لولادك ولاخواتك وجيرانك عن إضراب المحلة الباسلة
الناس لما بتتحرك مع بعضها بتبقى قوة وتقدر تحمي نفسها ، الحكومة ما تقدرش تسجن 70 مليون مواطن ولا حتى ألف أو ميه لو وقفوا وقفة رجل واحد…
عمال المحلة هاضربوا يوم 6 إبريل وهايتضامن معاهم عمال كفر الدوار و موظفي الضرائب العقارية … لأننا كلنا في مركب واحد
غلو السكر غلو .. أما بعنا عفش البيت
الإضراب مشروع مشروع ..ضد الفقر وضد الجوع
مجموعة تضامن