شكر وتقدير لكل اخواتنا اللى سندونى فى حبستى رغم انها مطولتش

الاطباء والاهالى يتظاهرون سويا من اجل اجر عادل للاطباء والعمال والموظفين تصوير كريم البحيرى

كتب - كريم البحيرى

انهاردة السبت كان فى وقفة احتجاجية للاطباء فى مدينة المحلة الكبرى بالمستشفى العام بدءت الوقفة الساعة 9 صباحا وكان الاطباء جوا المستشفى بيتكلموا عن الحالات السيئو اللى يتعرض ليها الطبيب بسبب ضعف مرتبه والتى وصلت لحد ان الاطباء يشحتون فى وسائل الاعلام علشان يتعالجوا رغم ان الرقصات مولعنها علاج على نفقة الدولة

وبعد كدا الامن حجز وسائل الاعلام من الدخول للمستشفى ودا خلا الاطباء يخرجوا للشارع وبعد خروج الاطباء للشارع قام اخوتنا فى امن الدولة ربنا يرحمنا منهم ومعاهم رئيس مباحث قسم اول ياسر عبد الحميد بالقبض على كريم البحيرى صاحب مدونة عمال مصر واحتجزة داخل سيارة امن وتم اصطحابة الى قسم اول المحلة الكبرى بعد اخذ الكاميرا الخاصة بيه والموبايل ومنعوه حتى من انه يستحمل حقة فى اجراء مكالمة ولكنة استطاع عن طريق احد زورا من فى السجون الاتصال بسهام شواده الصحفية فى جريدة الاهالى والتى قامت على الفور بالاتصال بعديد من المدونيين والنشطاء وكمان اتصلت بعم حمدى حسين مدير مركز افاق اشتراكية وبالدكتور سامى فرنسيس احد الاطباء المشاركين فى الاضراب اللى انتقلوا جميعا الى مقر القسم وانتظروا خروج كريم من الساعة 10 صباحا وحتى الساعة الثالثة عصر

اما دخل القسم قام رئيس المباحث ياسر عبد الحميد وبعض العاملين بالقسم من امناء ومخبرين بتهديد كريم البحيرى بالاعتقال ودا اللى هيربية لانه مش متربى على حد قول اخوانا رئيس المباحث

وبعد ساعات من العرض ووضعه فى السجن اكثر من اربع مرات وكورسات التهديد بالاعتقال على الاقل 9 سنين وان السياسين لم بيعتقلوا زى المغضوب عليهم كدا بيطلع عنيهم وبيتعلموا الادب

تم الافراج عن كريم بعد عمل محضر تحرى ولكن ما جعل رئيس المباحث جعل كريم ينتظر طويلا هو ان كريم اتلامض معاه حبتين فمعجبش رئيس المباحث فحطة فى السجن علشان يتعلم الادب

والمصيبة السودا بقا ان مش رئيس المباحث بس اللى طلع حكايته حكاية لا دا كمان جه واحد القسم شكلة اسم النبى حارسة وصاينة شيك اوى بيقولوا عليه ان مدير امن من وزارة الداخلية سئل اخونا البعيد كريم البحيرى اللى عمل كلوا فى دماغهم من كتر التصوير انت تهمتك ايه قالوا انا مراسل صحفى ومدون وكنت بصور قاله اه اه مدون قالة اه قالوا طب بقا معاك تفويض من الجرنال بتاعك قاله اخونا البعيد كريم البحيرى ان نصف صحفيين البلد مش معاهم تفويض قالة طب خليك قاعد بقا يعنى بالعربى اتلقح هنا بدل ما يقول اسم النبى حارسة ان وجود كريم مخالف للقانون

معلشى انا نسيت ااقولك ان كريم دا يبقى انا بس انا بتكلم عليه بصفت الغايب لانه كان حاسس ان الحبسة دى كانت هتطول ودا خلانى اكتب الكلام دا وانا جوا السجن قبل ما اخرج

عموما انا دلوقتى بخير وخرجت وخلونى كمان اشكر كل اللى كلمونى وساعدونى للخروج

ومنهم وعلشان منساش حد الاستاذة سهام شواده الصحفية بالاهالى وعم حمدى حسين مدير مركز افاق اشتراكية بالمحلة الكبرى والدكتور سامى فرانسيس احد الاطباء اللى عملوا الوقفة وباهو البنت اللذيذة اللى فى حركة تضامن اللى بيتبناها مركز الدراسات الاشتراكية والاستاذة فاطمة رمضان النشطة فى مركز الدراسات الاشتراكية واخيرا بقا النجم الكبير والباشا المصرى اللى عايش فى امريكا حاليا وابويا فى التدوين واخويا اللى مجبهوش ابويا واللى خليت شكرى ليه فى الاخر لانى لو كتبت كتير مش هوفيه حقة وهو حسام باشا الحملاوى صاحب مدونة عرباوى وبردة كمان اشكر علاء عياد الصحفى فى موقع اخوان اون لين اللى لما عرف انى اتقبض عليا زعل انهم افرجوا عنى اصله كل اللى فاتوا كان نفسهم يعملوا الواجب معايا وكمان اشكر الاستاذ ابراهيم المتولى الصحفى فى المسائية اللى لما عرف زعل جدا انه معرفش يعمل الواجب معايا وانا محجوز اما بقا الاخ المحامى فرج عزيزة واللى كان اكتر واحد نفسه كريم يترزع ويتحبس علشان يطلعه بشكرة بردة رغم ان اليوم اللى كان بيستناه يعينى علشان يطلع كريم جه على فاشوش اصل الباشا كان مسافر فى محكمة برة المحلة وكمان بشكر الاستاذ زكريا رمضان المحامى اللى لما عرف بعتلى محامى لكن ولاد ستين فى سبعين قالوا للمحامى مفيش حد اسمه كريم البحيرى هنا وعايز اشكر ناس كتير واسف ان كنت نسيت حد بس والله غصب عنى للسجن احكام اه قبل ما انسى انا بقدم الشكر وكل الشكر للزميلة والاخت الغالية نواره نجم صاحبة مدونة جبهة التهيس الشعبية اللى عمرها ما كانت بتسبنى او بتسيب اى مدون فى ازمة وانا متاكد انها لو كانت عرفت موضوع القبض عليا كانت عملت الواجب وزيادة وانا بصراحة زعلان اوى انها معرفتش اصلى كنت موصيها على مكرونة بالبشمل

وبردة قبل ما انسى بقا الراجل الجدع محمود الششتاوى صاحب مدونة حنظلة بردة كان متابع معاايا على التليفون ديما شكرا ياحودة يانجم واللى بشكرة اووووى اوووى الاستاذ اسامة الشافعى مسئول الاعلام فى مديرية الصحة والنشط فى مركز افاق اشتاركية فى المحلة اللى اول ما عرف اتصل بيا فورا وكان زعلان جدا وفرح لما انا خرجت وبصراحة هو الوحيد اللى مشمتش فيا هو وباهو الباقى كلهم ومن ضمنهم مدير كتائب المدونيين المفجرين حسام كان بيتصل من امريكا ونفسة اقعد فى الحبس شوية علشان يعمل الواجب زى فاطمة رمضان اللى زعلت اوى انها معملتش الواجب معايا

ما علينا لو كنت نسيت حد اعزرونى وسامحونى

واخيرا اشكر كل زوار مدونتى اللى مسبونيش لحظة واحدة سواء بالاتصال او بالرسائل على الاميل شكرا ليكم ياحلى زوار فى الدنيا من برة وجو الارض المحررة المحلة الكبرى وبرة المحروسة كمان

اشوفكم على خير وهبقى احكيلكم بعدين انا قابلت مين فى الحبس وقالولى ايه

تحديث
بتقدم بالشكر كمان واللى عرفت انه اول واحد جالى بعد القبض عليا المحامى مصطفى صبحى الملقب بوالد جيفارا لانه عنده واد زى العسل اسمه جيفارا وكمان بشكر المدونة امنية النجار صاحبة مدونة مصريات اللى اتصل بيا لما شافت الخبر وبشكر بجد كل الناس اللى حاولت تطمن عليا اد ايه حسيت بالسعادة رغم ان اللى حصل حاجة بسيطة بس حسيت اد ايه الناس دايما معايا
اما بقا الحاجة التانية وانا جوا القسم فى الحبس قابلت بعض المساجين وكان عددهم فى البداية اتنين ثم ارتفعوا لاربعة بصراحة كنت خايف جدا فى البداية لانى اول مرة اطحط مع مجرمين دا طبعا قبل ما اعرف قصتهم وكنت متخيل انى لما هتحبس هتحط مع سياسين وعلشان كدا كنت مطمن لكن بدأت اكسر الخوف دا بأنى اتكلم معاهم وبدأت اسئل كل واحد فى الاتنين فى البداية اللى كانوا معايا انتم جايين لية طبعا مش هقول اسماء علشان اخوتنا البعدا المهم سئلت اول واحد لقيتة راجل محترم ولما سألتة عن سبب حضوره رد الشاب الاخر فورا احنا الاتنين هنا فى قضية واحدة ومش عارفين ايه هى لحد دولوقتى بقالنا يومين ومستنين العرض على النيابة لكن بردة مش عارفين امتى اخذنى الفضول عن ان اسئلهم ان كان احد قالهم عن سبب الوجود اكيد فى مخبر كدا ولا كدا قالهم وفعلا جاوبنى الراجل المحترم وقالى انا عندى محل كبير للالمونيا الجديدة وانا قاعد فى امان الله فى محلى لقيت مخبرين جايين ياهدونى ويفتشوا فى المحل وبيتى ولما ملقوش حاجة قفلوا المحل وقاموا كاسرين الباب بتاع المحل بعد ما اتقفل استغرب طب لية كسروا الباب بعد قفلة رد قالى والله ما اعرف المهم كمل الراجل المحترم وقالى انا فجأة لقتنى هيلا بيلا بقيت هنا وانا عمرى ما دخلت سجن والتهمة شراء خردة مسروقة واصرخ واقول يابشر انتم ملقتوش حاجة انا بتاع المونيا جديدة مش خردة ولا حياة لمن تنادى
ويتدخل الشاب اللى اكتشفت اد ايه هو جدع بعد شوية وهبقى ااقولكم لية قال انا بقا ياباشا حلوة ياباشا دى قالى كدا لما عرف انى صحفى المه اكمل الشاب انا بقا جاى هنا بتهمة انى بعتله الخردة دى رغم انى معرفش حاجة عن القصة دى انا واحد اتهمت قبل كدا بحمل سلاح ولما اتجوزت وخلفت قررت انى ابقا انسان كويس ومدخلتش القسم دا من 3 سنين لكن فجأة وانا ناسم على عربيتى الكارو اللى اشتريتها بالتقسيط علشان اعيش بالحلال لقيت مخبرين بيقبضوا عليا وبيجوبنى هنا وانا معرفش السبب وفى الاخر عرفت ان التهمة سرقت الخردة وبعها للراجل المحترم دا واشار للزميل الاخر اللى اتكلم فى الاول ويكمل الشاب انا عمرى ما شفت الراجل دا غير هنا يبقى ازاى هبعله
وبعدين شويا كسر حاجز الصمت دخول اتنين بردة واحد منهم اتحجز 3 شهور بتهمة ملفقة والتانى طلعوا عين اهلة ومكنوش عايزين يفرجوا عنه فى قضية ضرب لو مدفعش 10 جنية قيمة تصوير لولا اننا دفعنا العشرة جنية وطلع الولد
ااقولكم لية بقا الواد الشاب الاولانى جدع من ساعة ما قعدت وعرفوا حكايتى وهما شالونى من على الارض شيل سجاير واكل وخلو ناس من معارفهم يكلموا اصحابى علشان يعرفوهم انى مقبوض عليا وكمان خلونى اتكلمت فى تليفون حاجات كتير اوى عملوها او تحديدا الواد الشاب الجدع هو اللى كان بيعملها لية منى كل الشكر والتقدير
اخيرا بقا رغم انى احداث كتير وقعت منى لكن ااقدر ااقولكم ان السجن بعد 10 دقايق من الحديث اتقلب كلة للحديث عن السياسة وارتفاع الاسعار الجنونى واللى خلا كل المساجين يعملوا اللى بيعملوه لو واحد سارق فدا لانه مش لاقى ياكل وغيرها كتير وتعنت الحكومة مع الناس وتلفيق القضايا وكمان اتكلمنا وقلتا نكت اخر جنان على الحكومة اللى نضفت جيوبنا
طبعا مش هقول النكت اصل يقوللنا سب وقذف

اخيرا بقا اكتب عن الوقفة الاحتجاجية

الغربية- كريم البحيري

نظَّم أكثر من 500 طبيب من مدينة المحلة الكبرى ومدن محافظة الغربية وقفةً احتجاجيةً داخل المستشفى العام للمطالبة بالكادر الخاص وأجور عادلة أمس.

ردد الأطباء هتافات توضح مطالبهم منها: "لن نتسول حقوقنا"، "وما نيل الكوادر بالتمنى لكن تأخذ الدنيا احتجاجًا"، "يا نظيف باشا يا نظيف بيه كيلو الزيت بـ10 جنيه"، كما رفعوا لافتاتٍ تُطالب بأجور عادلة، وتسخر من وضع الطبيب المصري؛ حيث أكدت لافتة أن راتب الطبيب الصومالي أكثر من الطبيب المصري!.

و أكد د. أيمن زكريا أبو عمو إخصائي التحاليل بالمستشفى العام أن الأطباء أصبحوا يتسولون من أجل الحصول على حق العلاج، مستشهدًا بأحد الأطباء الذي انتقل له فيروس سي "التهاب الكبدي الوبائي" نتيجة احتكاكه بالمرضى، وعندما لم يستطع العلاج تسول العلاج في إحدى القنوات الفضائية.

وقال: إن الطبيب لن يستطيع العمل إذا لم يكن يحصل على مقابل مالي جيد، مشيرًا إلى أن الطبيب كي يتخرج يحتاج آلاف الجنيهات فيما لا يحصل بعد التخرج سوى على ملاليم قليلة.وأوضحت د. هناء الشوربجي إخصائية أطفال ورئيس مكافحة العدوى بالمستشفى أن مرتبها الأساسي 385 جنيهًا في حين أن مرتبها الشامل 550 جنيهًا رغم أنها تعمل كطبيبة منذ 25 عامًا، مؤكدةً أنه ليس من العدل أن يصرف الطبيب آلاف الجنيهات للتخرج، ولا يجد سوى ملاليم في الوقت الذي يتطلب منه أن يعيش في مستوى اجتماعي محترم كي يستطيع العمل.

وطالبت بأن يحصل الطبيب على حقه لتحسين وضعه الاجتماعي حتى لا يضطر الطبيب إلى اللجوء إلى طرق غير شرعية كي يكمل متطلباته واحتياجات أسرته، مشيرةً إلى أن الإضراب هو الطريق السلمي الذي تفهمه الحكومة وتشعر به وترد عليه وهو أحد الطرق التي تلازم الطرق الأخرى كطريق التفاوض.

وقال د. علي بحر عضو مجلس نقابة الأطباء في الغربية إنه لن يتم صرف الكادر بسهولة إلا عن طريق اللغة التي تفهمها الحكومة وهي الاحتجاج، ونحن نحتج اليوم لمدة ساعتين احتجاجًا شرعيًّا كوننا ملوكَ رحمةٍ ولن نعطل المستشفى بشكلٍ طويل.

وعلى جانب آخر أفرجت السلطات الأمنية بالغربية عن محرر "مدونة عمال مصر" بعد احتجاز دام خمس ساعات بعد عمل محضر تحرٍ له على خلفية إصراره على تغطية الوقفة الاحتجاجية للأطباء الغربية.

وكانت قوات أمن الدولة وقسم أول ألقت القبض عليه بعد ساعة من بدء الوقفة ونقل إلى مقر قسم أول لمدة أكثر من 5 ساعات وتوالى تهديد رئيس مباحث قسم أول ياسر عبد الحميد له؛ حيث هدده بالاعتقال حتى لا يراه مرةً أخرى
لمزيد من التفاصيل الاتصال باى من الرقميين التاليين

0123308885 / 0169338186