الغسيل الوسخ للحزب الوثنى حصريا فى مدونة عمال مصر

كتب - كريم البحيرى
انبارح قام السيد جبر عضو مجلس الشعب عن مركز المحلة حزب وطنى "( مسئول الامن بشركات احمد بهجت ) بأقتحام مكتب منصور أبو حسن رئيس المجلس المحلى ودا طبعا بعد الحزب ما فلسع ابو الحسن من الترشيح المرة دى وعلى اثارها قام ابو الحسن ومعه انصاره من بلدة ميت الليت هاشم وكانوا حوالى 600 بعمل مظاهرة امام الحزب الوطنى فى المحلة علشان يعترض على عدم ترشيح الحزب لية بس مش دى المشكلة الموضع ان عضو مجلس الشعب ومسئول الامن فى شركة احمد بهجت ومعاه اربعة بودى جارد اقتحموا مكتب ابو الحسن الموجود فى الحزب الوطنى وللعلم دا كمان مقر المجلس المحلى مش الحزب بس المهم بعد ما اقتحموا المكتب كسروا كل محتوياته واعلن اللواء السيد جبر عضو مجلس الشعب ان المكتب دا من انهاردة بقا بتاعه رسمى رغم ان حتى بعد عدم ترشيح الحزب لابو الحسن الا انه مازال رئيس المجلس المحلى لحد 31 مارس الحالى
وعلى فكرة الموضوع دا حصل لان فى خلافات بين عضو مجلس الشعب ورئيس المجلس المحلى فى انتخابات الامانات الخاصة بالحزب وانتخابات مجلس الشعب بردة ولما عضو مجلس الشعب فاز بانتخابات مجلس الشعب الحزب خلى ابو الحسن رئيس المجلس ودا طبعا زعل سيادة اللواء عضو مجلس الشعب اللى قرر يسقط منصور بأى طريقة واول ما ظهرت النتيجة انبارح وابو الحسن مش فيها اقتحم عضو مجلس الشعب المكتب واعلن استعماره للمكتب زى الصهاينة ما استعمروا واحتلوا فلسطين ياعينى يابو الحسن دى اخرت اللى يمشى فى ديل الحزب الوثنى

اما بقا الموضوع التانى والجامد اوى ان انتخابات الحزب الوطنى للمحليات بدء بوادرها تبان بعد اعلان النتيجة اللى تم استبعاد عدد كبير من اللى كان من المفروض يجوا
وعلشان كدا بدء بتوع الحزب اللى سقطوا يطلعوا غسيل الحزب الوسخ ومنها موضوع انهاردة اولا الحزب كان المفروض عامل شروط للترشيح للمحليات لكن كلها الشروط طلعت كوسة
ازاى ياعم كريم يابحيرى ااقولكم ازاى ياخوانا ياحلوين الحزب الوثنى سورى الوطنى كان عامل شروط ترشيح ان لازم يكون عند سيادة المرشح التزام حزبى يعنى ميكنش سعادتة اترشح قبل كدا ضد الحزب وثانى حاجة ان يكون من الكوادر الشابة حلوة الشابة دى يعنى ميكونش عجوز ومكحكح يكون واد قطقوط كدا يعنى كبيرة 35 سنة علشان قال ايه يعرف يخدم الناس ما علينا
وكانوا كمان طالبين انو يكون عنده انتماء وولاء طبعا مش سعاد ولاء وبس وسلمولى على الولاء والشرط الاجمل انه يكون عنده شعبية بين اهالى دائرتة وطبعا الحزب الوطنى دايما انتخاباته وشعبية 99.9 فى المائة بيقولوا نعم وطبعا دا بان فى التعديلات الدستورية يبقى اكيد اعضاء الحزب بيتمتعوا بشعبية زى الفل والشرط الاخير بقا ياحلوين القدرة على الاختلاط بالجماهير
ياخرابى اختلاط بالجماهير ايه الكلام الكبير دا يعينى طب دا هيختلط ازاى ما علينا
الجميل بقا واللى بجد الحزب عمله وكان زى الفل ان كل شروط الترشيح دى مكنش علشان اللى هيترشحوا لا دا اللى هيلاقوا فيه الشروط دى هيفلسعوه طب ايه الدليل ياعم كريم ياللى بتتجنى على الحزب الوطنى اصلك اشتراكى دمك تقبل وبتكره الوطنى وشكلك كدا عميل للكوسة
براحة بس ياجماعة هقولكم بالدليل مثلا نتكلم عن قوائم المرشحين للمحافظة عن دائرة مركز المحلة الكبرى وبشبيش
يعنى اللى نجحوا كانوا هما
حامد جلال حامد جهجة 31 سنة ودا راجل معلهوش اى اعتراض سنة ومناسب ومترشحش ضد الحزب وفيه كل الشروط كويس يبقى انت بقا ياعم كريم ببتجنى على البشر دى ... استنوا بس يابشر ما هو اللى نجح بعد كدا كان
شكرى على طه ضيف 47 سنة
سامية حامد عبد الغنى يوسف 54 سنة
عبد المنعم عبد العزيز عبد الحميد 56 سنة
نبيل محمد ابراهيم عبده 57 سنة
اللواء محمد حمدى منصور عاشور الشهير بحمدى عاشور 63 سنة
محمد عاطف حسن عامر 64 سنة
احمد السيد عباس خضر 55 سنة
ناصف عبد الله مصطفى المسيرى 45 سنة
محمد محمد حسن الشامى 56 سنة
دول طبعا بقا كلهم شباب وحيوية وكلها حنية وسلمولى على فلورا مع الاعتذار لفلورا حبيبتى والمصيبة الاكبر مش السن بس لا دا كل الشروط مش فى ولا واحد فيهم طب ياعم كريم اضربلنا مثال
نقول مثلا عبد المنعم عبد العزيز يوسف اولا لم يتوافر فيه السن لان سعادتة 56 سنة ثانيا قام قبل كدا بالترشيح ضد الحزب الوطنى كمستقل لما الحزب هبدوا بالرجل ورفض يخلية ينزل باسم الحزب فى انتخابات الشورى اللى فاتت فقرر انه ينزل مستقل يعنى كمان معندوش ولاء او التزام حزبى تانى ولاء ياكريم خلاص ياجعادن معندوش صفاء حزبى وايه كمان البية فى الانتخابات اللى دخل فيها مستقل حاول يشوف هو جايب كام صوت فى دائرته فى منشأة الامراء لاقى نفسة جايب 200 صوت رغم ان البلد 5000 الاف صوت يعنى كمان ملوش شعبية حتى فى بلدة طب والقدرة على الاختلاط اختلاط تانى معلشى بقا مش مهم حتى البتنجان دا معندوش منه اصلوا فضل 14 سنة عضو فى المجلس المحلى ومعملش خدمة لاى حد فى بلدة ودا بشهادة اهالى البلد والاكثر من ذلك ان الحزب الوثنى كان حط لائحة داخلية انه لا يتم ترشيح اى حد من امناء الدوائر واعضاء هيئات المكاتب ورغم كدا تم ترشيح الاخ رغم انه رئيس الوحدة المحلية فى صفط تراب ورغم كل المخالفات دى للوائح الداخلية للحزب الا انه رشحة
طب ياعم كريم ادينا مثال كمان علشان الامانة بس ... ماشى يارجالة والله كلمتكم ماهى نازلة الارض
الاخ اللواء محمد حمدى منصور عاشور الشهير بحمدى عاشور 63 سنة اولا سنة غير مناسب ثانيا امين دائرة بشبيش مركز المحلة يعنى لا شباب ولا حاجة الا لو طبعا الشباب بعد الستين يابقى لسة عمره 3 سنين طب دى وهنعديها طب وبخصوص اللوائح الخاصة بعدم ترشيح امناء الدوائر هنعمل فيها ايه دى بس الحقيقة ان تم اختيارة بس علشان هو من انصار عبد المحسن ابو الخير عضو مجلس الشعب عن الحزب الوطنى فى دائرة بشبيش
طب كفاية كدا ياسى كريم بقا وخلى الطابق مستور وكفاية نشر الغسيل الوسخ اصل الريحة بتجبلنا زوكام
عموما كفاية كدا ونشوفكم على خير فى باقى الغسيل الوسخ قريبا
لمزيد من التفاصيل الاتصال برقم
0123308885 /0169338186