هذه من سرقت قلبى

تغريد والمناضل احمد الصياد والدها
تصوير حسام الحملاوى

المهندسة تغريد احمد الصياد وخطيبها اللى هو انا كريم البحيرى
تصوير زعيم المدونيين حسام الحملاوى

هذه الصورة تم التقاطها فى يوم الجمعة الماضى بيد المصور وزعيم المدونيين حسام الحملاوى صاحب مدونة عرباوى فى غفلة من الزمن اما من داخل الصورة فهى اكبر سارقة فى العالم فقد سرقت قلبى الذى كنت اعتقد انه من الصعب سرقتها
وهى المهندسة تغريد احمد الصياد نجلة القيادى السياسى البارز والشاعر أحمد الصياد
اما من معها فهو العبد الفقير اللى هو انا كريم البحيرى اللى احتاس يوم لبس الدبلة لانه كان متوتر جدا
اما لماذا اخذت هذه الصورة يوم الجمعة تحديدا هذا لانة وبصراحة كان يوم خطوبتى يعنى اخيرا دخلت القفص وبصراحة احلى قفص فى الدنيا مع احلى سارقة فى الدنيا
ياريت كل اللى متجوزوش يتجوزوا وسبوكم من المتجوزين المعقدين بتوع ينعل ابو اللى اتجوز قبل ومقاليش واتجوز بعدى ومشارنيش بصراحة ياجدعان الموضوع بيعتمد على الاثنين وانا بصراحة فى اجمل لحظات حياتى حتى ان عدد كبير من اصدقائى قالوا لى احنا حاسين انك بقيت مختلف والسعادة بينا فى عنيك
وبصراحة بصوا فى الصورة وانتم تعرفوا مدى السعادة اللى انا فيها وطبعا النجم الحملاوى احسن حد يطلع صور مبينة كل تفاصيل العين واعتقد ان اللى يعرفونى بشكل شخصى حسوا اد ايه انا بقيت مختلف وادين بفضل الاختلاف دا لخطيبتى المصون
قريبا سيتم رفع صور الخطوبة بالكامل لانها بصراحة عند اكتر من 10 اشخاص هما اللى كانو متولين عملية التصوير
وانا عارف ان فى ناس هتقولى ياندل معزمتناش وانا هقولهم والله كانت على الديق وعائلية وقريب اوى هنعمل حفلة لاصدقائنا وهدعو كل الناس ويمكن ادعوا فيها مبارك نفسة يمكن يجى ولو جة اوعده انى هطردة برة يعنى الدعوة بس علشان اطردة
دعونى اقدم فى هذا البوست كل حبى وامتنانى الى شخصين الاول هو كل من قام بالاتصال بى لمباركتى مع عذر الى من لا يعلمون والى كل من قاموا بنشر خبر خطوبتى تحياتى لكم جميعا
اما الشخص الاخر والاخير فهو خطيبتى وحبيبت قلبى تغريد اقدم لها بكل فخر وامتنان قلبى وكل حياتى وانا فى قمة سعادتى واقول لها شكرا لكى ايتها السارقة لانك سرقتى قلبى فى وقت كنت اتمنى ان اجد من يستطيع ان يفعل ذلك
تحياتى لكى يامن ملكتى قلبى