Tuesday, November 6, 2007

فصلونى لانى طالبت بحقى

فصلونى لانى أطالب بحقى المشروع
انا عارف ان البعض هيستغرب من العنوان وخصوصا بعد ما تقروا التفاصيل لكن الحقيقة انه تم فصلى لانى اطالب بحقى
يرجع الموضوع عندما فوجئت امس انا كريم البحيرى الموظف بمكتب العمل فى شركة غزل المحلة وصاحب مدونة عمال مصر اللى جابتلى الكافيه عند خروجى من بوابة الانصراف وعند توقيعى فى دفتر توقيعات الموظفين على البوابة لقيت مكتوب عبارة " أنهاء خدمة ابتداء من6/11بسبب الغياب المتقطع أمام اسمى وكأنى اعمل فى طابونة وصاحبها بيقولى روح متجيش بكرة خرجت وانا فى قمة الذهول انا مجليش حتى انذار فصل وبعدين هو انا غبت اللى يخلينى اتفصل قعدت اضرب سبعات فى تمانيات واخيرا جه اتنين زملائى واحد يعمل موظف بالجراج اسمه وائل حبيب والتانى يعمل فى المخازن العمومية واسمه جمال ابو الاسعاد قالولى مالك قولتلهم اتفصلت جالهم حالة ذهول لانة كانوا سمعوا عن الموضوع لكن افتكروا انه مجرد تهويش وقالولى ايه السبب قلتلهم بيقولوا على البوابة انى مفصول غياب قالولى خلاص تعالى نروح لرئيس النقابة مسعد الفقى وخصوصا انه لسة ماسك مكان صديق صيام اللى خرب بيت العمال وفى ناس بتقول ان مسعد الفقى اجدع من صديق هنشوف هيعملك ايه قولتلهم هو انا مش طايق النقابة بس تعالوا نشوف ايه اللى هيحصل رحت وانا عارف انه مش هيقدر يعمل حاجة ورغم ذلك رحت اشوف اخرتها ايه دخلنا على رئيس النقابة المهم اول ما شافنى وعرفت انى كريم البحيرى قالهم حرام عليكم دا كريم مقطعنا قعدت مستغرب وسألتة يعنى ايه مقطعكم قالى شوف اللى بتكتبة علينا كل شوية ومهاجمتنا فى الجرائد ومواقع الانترنت وبين العمالوكأنى مطلوب منى انى اشوف الفساد واسكت المهم قلتلة يعنى هتقدر تساعدنى ولا اعتبر كلامك انى ااقوم اخد بعضى واروح قالى لا انا لسة كنت بتكلم مع محمود الجبالى رئيس مجلس الادارة علشان يديك فرصة للعودة للعمل وخصوصا انك طوال 3سنين ماشى كويس ومجلكش ولا انذار ولا خدت فرصة ومن حقك تاخد فرصة المهم قالى ان رئيس مجلس الادارة رفض لكنة هيحاول مرة تانية انهاردة وخدنا بعضنا ومشينا على اساس انى هقابلة بكرة ونروح لرئيس مجلس الادارة علشان نخلص الموضوع رحنا يخويا الصبح انهاردة الثلاثاء6نوفمبر علشان نروح للجبالى لكن لقيت مسعد بيقابلنى فى مكتب العمل ودخلنا للمدير العام بتاع مكتب العمل اللى تفصله بوابة حديد عن المصانع وعليها خمسة حرس " اصل يقولوا انى دخلت هيجت العمال ولا حاجة زى ماقالوها قبل كدا " المهم دخلنا للمدير العام اللى قال ياستاذ مسعد انا لما كريم كان خارج من العملية كان غاب 8ايام فجيت سألتة ياكريم انت ايه المشكلة قولتلة انا عايز اعمل اجازة 8ايام علشان ميجليش جزاء وبالفعل مضتله على 8ايام اجازة بدون اجر علشان ميقبضش مرتبة فيه خصم وينهيلة مشكلتة لو كان فى اى مشكلة فى الغياب وخصوصا انه محطوط فى البلاك لست للادارة علشان كان ظاهر اوى فى اضراب سبتمبر والوقفة الاحتجاجية اللى طالبت بسقوط الجبالى لكن بعد شوية الادارة مردتش وتقريبا رفضت تقبل الاجازات وبعدين انا الموضوع مش فى ايدى رد مسعد قاله اه انا فهمت وزى ما اكون انا الوحيد اللى مش فاهم ماعلينا علشان مطولش عليكم خرجنا من عند المدير العام ومسعد بيقول يعنى انته وقعتله على اجازات واترفضت انا كدا فهمت وعرفت انهم لما قالوا ان كريم غايب 43يوم كانو بيتكلموا وخلاص عموما انا هشوف الموضوع دا واطلع بكرة لرئيس مجلس الادارة تانى وبعد ما خرجنا قالى رئيس النقابة ياكريم ااقولك بصراحة انا هبقى معاك برقبتى بس صدقنى الموضوع كبير واكبر منى ومش عايز اوعدك بحاجة مقدرش انفزها ساعتها حسيت انى بن لادن قولتلة لية كل دا قالى هما فوق بيقولوا ان كل اللى فى الاضراب كوم وانت كوم تانى والدليل انهم شالوا جزاءات لناس شاركت فى الاضراب ومنهم مجدى شريف اللى اتشال3ايام جزاء من علية لكن انت موضوعك صعب شكرتة واحترمت اعترافة وخرجت من البوابة وانا بفكر لقيت فجأة واحد من الامن بيقولى انت كريم قولتلة اه قالى هقولك كلمة لله قولتلة اتفضل قالى الموضوع مش فى ايد اى حد الموضوع فى ايد الجبالى هو الوحيد اللى فى ايده الحل وبعدين لو حتى طعنت فى قرار الفصل هما اكيد عاملين حبكة قانونية واكيد مظبطين الموضوع وبعدين هما كانوا بيعتبروك خطر عليهم علشان الفضايح الاعلامية اللى كل شوية تعملها والموقع بتاعك اللى بيقولوا انك بتشتمهم فيهم وبصراحة هقولك انت دلوقتى خلاص لو مقدرتش تتفاهم مع الجبالى الموضوع هيبقى صعب قولتلة قبل ما امشى هقولك كلمتين لو مش هلاقى اكل انا مش هروح استعطف واحد سرق حقوق العمال وقال فى يوم مؤتمر التأيد اللى كان عاملة لنفسة اللى حصل علي اثرة الوقفة الاحتجاجية اللى طالبت بأقالتة ان اللى عملوا اضراب سبتمبر شوية عيال وهيكون تصفيتهم على اديا وقررت بعدها الخروج الى الشارع وتوجهت لاول سيبر نت لاكتب كل شىء
ملحوظة انا تم نقلى بعد اضراب ديسمبر2006الى اكتر من قسم حيث كنت اعمل فى اول تعينى منذ 3سنوات بقسم السكرتارية العامةى ثم تم نقلى بعض الاضراب الى قسم الزوى العمومى احد المصانع التابعة لمصانع الغزل ثم بعدها وبسبب اضطهاد الامن لى وزيارتة كل يوم لى فى مكتبى بمبرر وبدون مبرر وفى احدى المرات تم اصطحابى للتحقيق معى فى انى احرض العمال على الاضراب اضطر المدير العام لمصنع الزوى نقلى بعض الضغوط عليه الى ادارة الغزل الذى لم استمر فيها سوى اربع ايام بسبب الضغوط التى تمت على رئيس القطاع وتم نقلى اخيرا الى مكتب العمل والذى تم فصلى اثناء عملى فيه
وللعلم كنت قد اجريت جراحة بالقدم فى شهر 8قبل الاضراب وكان يوهمنى الاطباء بأنه يتم اعطائى مرضى واشك بأنه كان يتم تزوير المرضى والأجازات حيث ان احد ايام الفصل يوم 21اكتوبر وتم تغيبى فيه رغم انى كنت موجود بالعمل وموقع على البوابة
اخيرا لم اكتب كل هذا لانه تم فصلى ولكن لانه كان مقرر تصفية الشركة من كل من شاركوا فى الاضراب وخصوصا بعد ان صرح الجبالى بعد الاضراب بأن عنده فائض عمالة 50بالمائة وتزامن ذلك مع وجود بعض المسثمرين وبصحبتهم وفد من الاتحاد الاروبى والقوى العاملة يسئل العمال عن مرتباتهم وان كانت تكفيهم ام لا وعن ثقافة الاضراب لديهم كل هذا تمهيدا للخصخصة وكل ذلك تزامن مع فصل كثير من العمال يوميا من عملهم وعدم السماح بالفرصة الا لمن لهم علاقات بزوى السلطة والمقربين من رجالة الادارة العليا
والغريب فى الامر فى كل هذا ان طوال اليوم وانا احاول ايجاد طريقة للرجوع قال احد المسئولين انت اللى غلطان ياكريم لانك عاديت الادارة وبعدين المشكلة انك شغال فى الادارة اللى هى بالنسبة لرئيس الشركة بيعتبرها زى الفراخ البيضة يعنى جزء من النظام مينفعش تعادية يعنى لازم تكون معاه
لذلك ادعوا الجميع للتضامن مع كل المفصولين من الشركة بعد اضراب سبتمبر لوقف اى مجال لخصخصة الشركة واقصاء النضال العمالى من اجل حقوقهم ومن اجل الا نصبح فرخ بيضاء فى عشة النظام
لنقف جميعا ضد نظام فاسد بأكملة يرغب فى اقصاء كل من هو له نشاط
واعلن رغم انه تم فصلى ومن قبل تم اتهامى بتحريض العمال من قبل رئيس مجلس الادارة والنيابة الا انى اعلن اننى لن اصبح فرخة بيضاء فى عشة النظام مهما حدث
دلوقتى تقدروا بعد التفاصيل تعرفوا انى اتفصلت لانى بطالب بحقى وخصوصا لما واحد من اعضاء النقابة حاول يكلم رئيس قطاع الشئون الادارية بخصوصى قالة الا كريم دا احنا ما صدقنا طولنا رقبتة علشان كل واحد يلم نفسة ويبطل يطاول على مسئولية وبعدين لو كان اى عامل تانى طالب فرصة مهما كان عامل كنا هنديلة فرصة لكن كريم لا وكأن كريم بعبع للادارة
كل دا يثبت انى كنت بطالب بحقى وعلشان كدا تم فصلى مش علشان غياب او غيره لذك علينا جميعا ان
يكن لنا وقفة ضد نظام فاسد
ليكن لنا موقف نحو تشريد العمال من اجل مصالح الكبار
ليكن لنا وقفة ضد ان نصبح اتباع للنظام
ليكن لنا وقفة ضد مجموعة ترغب فى خصخصة احلامنا
ليكن لنا وقفة ضد كل شخص يستخدم سلطتة فى اذلال الاخرين
كريم البحيرى المفصول من شركة مصر للغزل والنسيج بالمحلة الكبرى " الارض المحررة "والمقدسة
لمزيد من التفاصيل الاتصال برقم
0123308885

9 comments:

مهندس مصري said...

طبو ايه رد فعل العمال اللي كانت مضربة حيسيبوك تتفصل فطيس كده

أحمد عبد الفتاح said...

يااااااااااااه يا مصر
منتي لسه فيكي رجاله اهه
بس اسمح لي يا بطل اختلف معاك
انت اتفصلت لانك طالبت بحق العمال مش حقك

hshady said...

مش هقولك متسكتش ومتخافش لأنك فعلاً لا بتخاف ولا بتسكت
وفيه وسائل كتير علشان تاخد حقك
عاش كفاح الطبقة العاملة

che_wildwing said...

جه وقت العمال
زي مانت وقفت معاهم لازم يقفوا معاك
وزي مان وقفت معانا
احنا كمان معاك

spellz said...

rabna m3aak enta w kol 3omal l ma7alla
rabna mabysebsh 7ad

كريم البحيرى said...

اشكركم جميعا واعلموا ان تضامنكم هو أحد اسباب ثباتى وقوتى

Anonymous said...

dear Karim...
i am so sorry for what happened...i know it s a difficult moment for you..but you have to know that u and the Mahalla workers were a big source of inspiration for us.
i was following day by day the strike..and i was amazed by what the workers are capable of doing...
what u have done is great and i wished we can do the same.
today the workers most stand next to you and the other workers to defend their rights and to oppose privatization...
karim..i am a lebanese t=young journalist..u have to know how amazing u were...i am supporting you and many of us here in lebanon do the same...how can i help..how can i contribute...?!!
cheers
farah

كريم البحيرى said...

عزيزتى الاستاذة فرح
انه لمن دواعى سرورى ان ارى تعليقك الذى اسعدنى جدا
واعلمى جيدا ان مجرد تعليقك هو مصدر قوى يضاف الى قواى لتجعلنى استمر فى عملى
واتمنى ان نكون على اتصال دائم
ومع كل الحب والتقدير الى كل الشعب اللبنانى الشقيق الذى يبهر العالم كل يوم بديمقراطيتة وانجازاته
وللعلم استطاعت قوة العمال بجانب التضامانات التى ارسلت لى ومساندة الكثير من الصحفيين المحترمين والمدونيين والسياسيين من مختلف الجهات الى الغاء قرار فصلى وعودتى من جديد
مع كل الحب والاحترام والتقدير

Anonymous said...

dear kari.it's a very joyful news...mabrouk!!
the mahalla workers are proving each days that by the worker's union and unity they will be able to realize their rights and to defy the unjust economic policy...
good job chabab...
go forward...
viva the struggle of mahalla workers..
cheers
farah