عجائب وطرائف

انا اليومين دول بصراحة عايش مرحلة من العجائب والطرائف تبدء المرحلة منذ تصفحى الجرائد يوميا الى مرحلة حال المجتمع المصرى
كل يوم امسك الجرايد الاقى فيها الاخوان وجمال مبارك يتصارعون على السلطة ومش عارف بتنجان بيه بيتخانق مع فلفل بيه على مش عارف ايه لما بقيت حاسس ان الجرايد بتاعنا دى بقت جرايد مهلبية مش جرائد توعية
انا عارف ان بعضكم هيقول ايه الجنون دا لا مش جنون ولا حاجة بس انا عايز ااقول ان لا الاخوان يصلحوا للسلطة ولا جمال مبارك ومش معنى كلامى ان فى حزب فى مصر ينفع يمسك السلطة لا انا شايف ان الاحزاب المصرية ما هى الا جثث ليس لها القيمة المؤثرة فكل ما تفعله الاحزاب وبصراحة وبدون لف ودوران انها بتتخانق مع بعض وبتفضح بعضها البعض علشان كل واحد يطلع على السلطة وكلامى دا مش كلام وخلاص لا تعالوا نجبهم شوية شوية وطبعا عفوا لو نسينا حد
الحزب الوطنى او حزب المهلبية العظمى شغال منافقون على كل شىء بدون نقاش الا قلة محترمة فيهم ولكن قلة لا تذكر
حزب التجمع مع تاريخة الطويل واحترامى الكامل له الا انه غير مؤثر فى المجتمع المصرى وما زال نشاطة داخل المقرات ولا يخرج منها الا كل فترات طويلة
حزب الوفد هو غريب يطالب بحقوق الناس وهو مش قادر يطالب بحقوق نفسه يعنى ايام الانتخابات الرئاسية كلهم وقفوا مع نعمان جمعة ولما انتهت بسقوط نعمان جمعة حصل الخناقة بتاعة البلطجية والتى اصيب فيها الكثير واصبح الحزب منقسم الى طرفين اتباع نعمان جمعة واتباع محمود اباظة واللى عايز اسئلة لو رجع نعمان جمعة لرئاسة الحزب هيفضل اعداءه اعدء ام سيصبحوا رجالتة المخلصين مش دا موضوعنا بس ازاى حزب مفكك داخليا يبحث عن الوصول للسلطة وبعدين حزب الوفد لم يثبت يوما جدارتة فى قضايا المواطنين البسطاء ولولا بصراحة الجرنال بتعاه انا نفسى مكنتش هعرف ان فى حاجة اسمها حزب وفد او غيره يبقى المواطن الغلبان هيعرف ازاى وكلامى مش معناه انى بنكر تاريخ الوفد لا ولكن هو توضيح
الاخوان المسلمين هما جماعة تبحث عن السلطة مثلها مثل الاحزاب وكمان مش عارفين مصدر تمويلها منين وكمان الاكثر رعبا موضوع ان لما المرشد يقول حاجة الكل يقول سمعا وطاعة وكمان طول تاريخ الاخوان كانوا قريبين من الحكم مع استثناءات ولولا ان مبارك فى الدستور عمل شوية حاجات شلت حركتهم كانوا بقوا زى السمن على العسل معاه
حزب الغد هو حزب محترم ولكنة ليس له وجود فى المجتمع المصرى مثلة مثل باقى الاحزاب وهذا ما يجعله ضعيف وهم لم يستطيعوا الدفاع امام السلطة التى اعتقلت الدكتور ايمن نور رئيس الحزب بعد الانتخابات الرئاسية فازاى بزمتكم حزب يطلب الافراج عن الدكتور ولا يملك حق الاعتراض الكامل يدافع عن حق المواطنين وغيرها من الاحزاب مثل حزب الكرامة تحت التأسيس الذى لا يعرفه سوا السياسيين ولا يسمع عنه المواطنين وغيرها الكثير من الاحزاب التى تعتبر وهم غير موجود ومع احترامى الكامل لكل القوى السياسية ولكنى لا ارى فى المجتمع المصرى اى حزب او جماعة تستحق ان تصل للسلطة ويجب ان يختار الشعب بنفسه من يكون رئيسا عليه لذلك ادعوكم لفض كلامكم المعسول واتركوا الشعب يختار من يحب ويجده نافع او اتركوا الشعب يمسك السلطة بنفسه فالشعب لا يحتاج لمن يمثلة وان اختار الشعب الاخوان المسلمين او جمال مبارك او غيره فهو الوحيد صاحب القرار ليس من يتشاجرون من اجل السلطة
اصبح القرار الان ليست تصريحات او كلمات وانما صناع القرا هم عمال وفلاحين مصر لانهم هم الغلبية العظمى فى هذا المجتمع لذلك اتركوا الشعب يختار من يحب ومن يرغب
عاش نضال العمال .... يسقط من تاجر بألام الناس